Toshkent maktablarida 10 va 11-sinf oʻquvchilari kameralar orqali kuzatiladi

Qarorga koʻra, “Smart School” elektron dasturi, avvaliga Olmazor tumanida sinov tariqasida 31 ta umumtaʼlim maktablarining 250 ta sinflarida joriy etiladi.

Qarorda yozilishicha, mazkur dastur orqali 10 va 11-sinf xonalariga maxsus kameralar oʻrnatilib, taʼlim sifati doimiy nazorat qilinadi, sinflarda oʻquvchilar davomati kuzatiladi, ularning ruhiy holati sunʼiy intellekt orqali aniqlanadi, shuningdek, oʻquvchilarning fanlarga qiziqishlari va oʻqituvchilarning pedagogik salohiyati baholanadi.

“Toshkent shahar hokimining oʻrinbosari (D.Raximova), Toshkent shahar Maktabgacha va maktab taʼlimi boshqarmasi (I.Yuldasheva), tuman hokimliklari Toshkent shahridagi umumtaʼlim maktablarining yuqori sinflarida oʻquvchilarning davomatini hamda taʼlim sifatini nazorat qilish maqsadida 10- va 11-sinf xonalariga maxsus kameralarni tuman mahalliy byudjeti mablagʻlari hisobidan oʻrnatish choralarini koʻrsin”, - deyiladi qarorda.

Qarorda kameralarni oʻrnatish tuman mahalliy byudjeti mablagʻlari hisobidan amalga oshirilishi reja qilingan.