Toshkent metrosida kassa operatorlari lavozimi bosqichma-bosqich tugatiladi

Toshkent metropolitenida yoʻlovchilar uchun qulaylik yaratish maqsadida yoʻl haqini toʻlashning 10 dan ortiq turi joriy qilingan boʻlib, elektron toʻlov tizimlari kengayib bormoqda. Koʻplab bekatlarda chipta sotuvchi avtomatlashtirilgan bankomatlar ham oʻrnatilmoqda.

Shu bois, kassa operatorlariga boʻlgan talab kamayib, ish oʻrinlari bosqichma-bosqich qisqartirilmoqda. Birinchi bosqichda 204 ta operator shtati qisqartirildi. Yil yakuniga qadar barcha bekatlarda bankomatlar oʻrnatilishi va operator lavozimlari butunlay tugatilishi rejalashtirilgan.

Shu bilan birga, "Toshkent metropoliteni" DUK maʼmuriyati qisqartirilayotgan xodimlar uchun qoʻshimcha imkoniyatlar yaratmoqda. Operatorlarga oʻz istaklariga koʻra kasb-hunar kurslarida qatnashish taklif qilinmoqda.

Kurslarda buxgalteriya, tikuvchilik, qandolatchilik kabi yoʻnalishlar mavjud boʻlib, oʻquv xarajatlari toʻliq metropoliten tomonidan qoplanadi.

Ushbu tashabbusdan asosiy maqsad lavozimi qisqartirilayotgan xodimlarni qoʻllab-quvvatlash va ularga yangi kasb oʻrganish orqali barqaror daromad manbai yaratishda yordam berishdir.