Toshkentda soxta DXX va PA xodimi 3,5 yilga qamaldi

Toshkent shahrida oʻzini Prezident administratsiyasi va Davlat xavfsizlik xizmati xodimi sifatida tanishtirib yurgan shaxsga hukm oʻqildi, deya xabar bermoqda Toshkent shahri Ichki ishlar bosh boshqarmasiga tayanib Gazeta.uz nashri.

Qayd etilishicha, poytaxtning Yakkasaroy tumani Shota Rustaveli koʻchasidagi tezkor tadbirda YPX xodimlari tomonidan fuqaro Javohir Orifjonov boshqaruvidagi Lacetti toʻxtatilgan. Hujjatlarni tekshirish jarayonida haydovchi oʻzini DXX xodimi ekanini aytib, yoʻl-patrul xizmati inspektorlariga DXXga tegishli boʻlgan guvohnoma koʻrsatgan.

Shuningdek, Orifjonov uni qoʻyib yuborishlarini iltimos qilib, goʻyoki yuqori lavozimda ishlovchi rahbar tanishiga qoʻngʻiroq qilgan. Ushbu shaxs YHX boshqarmasi xodimiga uni qoʻyib yuborish boʻyicha koʻrsatma bergan.

Ammo huquqni muhofaza qiluvchi organ xodimlari oʻzini shubhali tuta boshlagan shaxsning maʼlumotlarini tekshirib koʻrgan. Natijada fuqaro koʻrsatgan xizmat guvohnomasi qalbaki ekani, DXXga umuman aloqasi yoʻqligi maʼlum boʻlgan. Gumonlanuvchi shu joyning oʻzida ashyoviy dalillar bilan qoʻlga olingan.

Olib borilgan surishtiruvlar natijasida Javohir Orifjonovning qator boshqa ishlari ham oshkor boʻlgan. U, odatda, oʻzini prezident administratsiyasi va huquqni muhofaza qiluvchi organlar xodimi sifatida tanishtirgan hamda soxta mansabdor shaxs sifatida shaxsiy masalalarini hal qilib kelgan. Bunda u oldindan tayyorlab olgan soxta guvohnomalardan foydalangan.

«Men oʻzimni prezident administratsiyasida ishlovchi Alisher aka Sulaymonov deb tanishtirganman. Undan keyin oʻzim yana qaytib chiqib, oʻsha kishining jiyani boʻlaman, iltimos, ozgina yordamingiz kerak, deb oʻzimning ishlarim tezroq hal boʻlishi uchun yordam soʻraganman. Judayam notoʻgʻri bu, kechiringlar meni», — dedi 33 yoshli erkak.

Sud hukmi bilan Javohir Orifjonov Jinoyat kodeksining 228-moddasi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi «a», «b» bandlari va 228-moddasi 3-qismida nazarda tutilgan jinoyatni sodir qilishda aybli deb topilgan. Unga uzil-kesil 3 yil 6 oy muddatga ozodlikdan mahrum qilish jazosi tayinlangan. Jazoni manzil koloniyalarda oʻtash belgilangan.

Toshkent shahri IIBB Javohir Orifjonovning jinoyatlaridan jabr koʻrgan fuqarolardan yaqin oradagi ishchi ishlar organlariga yoki 102 raqamiga xabar berishlarini soʻradi.