Fargʻonalik ikki yoshli qizaloq qornidan 135 ta magnit sharcha topildi

Maʼlum boʻlishicha, qizaloq magnit sharchalar bilan oʻynab kelgan va shu jarayonda ulardan ancha-munchasini ichiga yutgan. Vaqt oʻtishi bilan sharchalar qornida yigʻilib qolgan va uning hayotiga jiddiy xavf solgan. 

Ota-onasi zudlik bilan Respublika shoshilinch tibbiy yordam ilmiy markazi Fargʻona viloyati filialiga murojaat qilgan. Tekshiruvlar oʻtkazilganida qorinning ikki yonida magnitlar yigʻilib qolgani aniqlangan. 

Shifokorlar konservativ usulda davolashga kirishib, qayd qildirish orqali sharchalardan 14 donasini chiqarib oladi, ammo aksariyati ichkarida qolgan. 

Shu bois bolaning ota-onasi uni Toshkentga, Respublika shoshilinch tibbiy yordam ilmiy markaziga olib keladi. Bu yerda goʻdak yana bir bor tekshiruvdan oʻtkazilgach, jarrohlik stoliga yotqiziladi.

"Shifokorlar saʼy-harakati bilan qizaloq qornidagi 135 ta magnit sharcha olindi. Toʻrt yarim soat davom etgan ushbu murakkab operatsiyani tibbiyot fanlari doktori, professor Habibulla Oqilov hamda markazning Nozim Oʻrmonov, Dilmurod Sabirov kabi tajribali mutaxassislari amalga oshirdi", deyiladi xabarda. 

Ayni chogʻda qizaloq shifokorlar nazoratida oʻzini yaxshi his etmoqda.