Uyi renovatsiyaga tushgan fuqarolarga kompensatsiya beriladi

Eskirgan, foydalanish uchun yaroqsiz va avariya holatidagi uy-joylarni qayta qurish – renovatsiya qilish orqali shahar va mahallalarni obodonlashtirish, infratuzilma obʼektlarini zamonaviylashtirish, hududlarni meʼmoriy, ijtimoiy, iqtisodiy va ekologik jihatdan yaxshilash, eski bino-inshootlarni yangilash, qulay va energiya samarador holatga keltirish shaharsozlikning muhim jihatlaridandir. Bu boradagi ishlarni amalga oshirish uchun esa zarur huquqiy asoslarni mustahkamlash lozim.

Shu maqsadda “Shaharsozlik renovatsiyasi toʻgʻrisida”gi qonun loyihasi ishlab chiqilib, parlament quyi palatasidagi fraksiyalarning yigʻilishlarida birinchi oʻqishda koʻrib chiqildi. Xususan, Xalq demokratik partiyasi fraksiyasining yigʻilishida ushbu loyiha partiya Saylovoldi dasturidan oʻrin olgan vazifalardan biri ekanligi alohida urgʻulandi. 

Tashabbuskorlarning maʼlum qilishicha, mazkur qonun loyihasining maqsadi shaharsozlik hujjatlariga muvofiq ishlab chiqilgan hududni meʼmoriy, ijtimoiy, iqtisodiy va ekologik jihatdan yaxshilash kabi shaharsozlik renovatsiyasi sohasidagi munosabatlarni tartibga solishdan iborat. Shundan kelib chiqib, qonun loyihasi bilan renovatsiyaning majburiy shartlari, asosiy prinsiplari, renovatsiya bosqichlari, bu borada loyihalarni ishlab chiqish va amalga oshirish tartibi, sohada davlat boshqaruvi asoslari belgilanmoqda. 

Qayd etilganidek, foydalanishga yaroqsiz holga kelgan, eskirgan koʻp qavatli uy-joylarning oʻrniga yangilarini qurish orqali hududlar obod boʻladi, koʻrkamlashadi. Ammo renovatsiya dasturi loyihasi renovatsiyaga tushadigan uy-joy mulkdorlarining roziligiga asoslanishi hamda keng jamoatchilik muhokamalaridan oʻtkazilishi, shuningdek, uyi renovatsiyaga tushgan fuqarolarni yangi uy qurilgungacha uy bilan taʼminlash yoki ijarada tursa, ijara xarajatlarini qoplab berish lozim boʻladi. 

Xalq vakillarining bu boradagi savollariga masʼullar qonun loyihasi bilan uyi renovatsiyaga tushgan mulkdorlarga bir qator kafolatlar berilishini, turar va noturar joy mulkdorlariga adolatli kompensatsiya berish tizimi nazarda tutilayotganini maʼlum qildi. 

Yaʼni, fuqarolar yashab turgan koʻp kvartirali uy renovatsiyaga tushganda, quruvchi ikki yil muddat ichida yangi uyni qurishi, oʻsha uydan fuqarolarga eski uyining hajmidan kam boʻlmagan va tayyor taʼmirlangan xonadonni pastki qavatdan berish majburiyatini oladi. Bundan tashqari, quruvchi yangi uy qurilguncha ijarada yashab turgan aholi vakillarining ijara pulini ham qoplab beradi. Yoxud turar va noturar joy obʼektlarining bozor qiymatida pul mablagʻlari berilishi belgilanmoqda. 

Renovatsiya qurilish muddati 2 yil etib belgilanmoqda. Agar quruvchi 2 yilda qurib ulgurmasa, kechikkan har bir kun uchun mulkdorlarga mulk qiymatining 0,5 foizi miqdorida penya toʻlashi oʻz aksini topmoqda.