UzAuto Motors 8 ta yangi model chiqarishni rejalashtiryapti

UzAuto Motors yaqin kelajakda avtomobil bozoriga sakkizta yangi model chiqarishni rejalashtiryapti. Bu haqda kompaniya bosh direktori Yanosh Kovach «Sherzodxon Qudratxoʻja bilan…» loyihasiga bergan intervyusida maʼlum qildi.

«Oʻn besh yil oldin bu yerda ishlaganimda vaziyat butunlay boshqacha edi. Hozir bozor ancha diversifikatsiyalashgan. Xitoy va Koreya mashinalari kirib kelmoqda. Yangi brend va modellar paydo boʻlyapti. Bu raqobat biz uchun qiyinchilik tugʻdirsa-da, xaridor uchun foydali», — dedi Kovach.

Shuningdek, UzAuto Motors bosh direktori ham ichki bozorda ham eksportda raqobat kuchayib borayotgani, elektromobillarga talab oshganini taʼkidlab oʻtdi.

«Raqobat nafaqat ichki bozorda, balki eksportda, masalan, Qozogʻiston, Ozarboyjon va boshqa mamlakatlarda ham kuchaygan. Har bir kompaniya xaridor uchun kurashmoqda. Shuning uchun biz ham strategiyamizni oʻzgartirishimiz, BYD, Kia, Hyundai, Haval kabi kompaniyalar bilan raqobatlashishga tayyor boʻlishimiz kerak va bu biz uchun katta chaqiriqdir», — dedi u.

Kovachning qoʻshimcha qilishicha, UzAuto Motors yaqin yillarda oʻz modellari qatorida, ayniqsa, SUV segmentini kengaytirishni rejalashtiryapti.