"Cobalt"ni navbatsiz olishingiz mumkin, faqat qimmatga

Iqtisodchi Otabek Bakirovning aytishicha, rasmiy narxi 155,2 million soʻm boʻlgan "Cobalt Midnight"ni baʼzi avtosalonlardan 167 million soʻm evaziga navbatsiz sotib olish imkoniyati taqdim etilmoqda.

"Avtostrada"ning yozishicha,  bunday savdo mexanizmi UzAuto Motors'ning yangi tizimi tufayli paydo boʻlgan. Unga koʻra, avtosalonlar endi avtomobillarni zavoddan sotib olib, narxni mustaqil belgilash huquqiga ega boʻlishgan.

Bakirovning yozishicha, endi dilerlar "bozordagi spekulyantlarga raqobatchi sifatida maydonga tushib", mijozlarga ikki xil shartni taklif qilishi mumkin:

Birinchisi, arzon, lekin uzoq kutiladigan variant – davlat narxida, lekin kamida 6 oy kutish sharti bilan;

 Ikkinchisi, tez va qimmat variant – bozor narxida, lekin navbatsiz.

"Bir qarashda goʻyoki jozibali koʻrsatilayotgan bu mexanizm aslida navbatdagi aldov. Chunki "Arzon, lekin uzoq kutiladigan variant – davlat narxida, lekin kamida 6 oy kutish sharti bilan” varianti amalda yoʻq. Va oʻzi yoʻq bu variant arzon ham emas, 7 oy avval  farasini qoraytirib, 7,3 mln.soʻmga qimmatlashtirilgan "Cobalt"ning oʻzginasi uchun ochiq kontraktatsiya mavjud emas. Xullas, toʻliq boʻlmagan 7 oyda "Cobalt" narxi 19,1 mln.soʻmga oshirib olinmoqda",  deya yozadi Otabek Bakirov oʻzining Telegram kanalida.

Iqtisodchiga koʻra, bu mexanizmning tiyuvchisi yoʻq.