"UzAuto Motors"ga nisbatan qarshi ish qoʻzgʻatildi

Qayd etilishicha, Raqobat qoʻmitasiga Qoraqalpogʻiston Respublikasida yashovchi fuqaro A.D.dan oʻziga tegishli 2023 yilda "UzAuto Motors" AJ tomonidan ishlab chiqarilgan "Lacetti L-Stayle MT" rusumli avtomobil olinganiga 5 oy ham boʻlmasdan nosozligi tufayli yonib ketganligini, lekin ishlab chiqaruvchi tomonidan ushbu holat oʻz vaqtida bartaraf etilmayotganligi yuzasidan murojaat qilgan. 

Ushbu murojaat qoʻmita tomonidan koʻrib chiqilganda holat oʻz tasdigʻini topgan. Shuningdek, aynan shu markali (modelli, artikuli) avtomobilda yongʻin chiqishi holati Navoiy viloyatida ham kuzatilganligi aniqlangan.

 "Qoʻmita Maxsus komissiyasi tomonidan "Isteʼmolchilarning huquqlarini himoya qilish toʻgʻrisida"gi Qonunining 14 va 20-moddalari talablari buzilish alomatlari boʻyicha "UzAuto Motors" AJ va "PSM-AutoSavdo" MChJlarga nisbatan belgilangan tartibda ish qoʻzgʻatildi", deyiladi xabarda. 

Shuningdek, qoʻmita tomonidan ushbu holat (avtomobilda yongʻin chiqishi) inson hayoti va uning sogʻligʻiga jiddiy ziyon yetkazishi mumkinligi holatlarini inobatga olgan holda, yuqorida qayd etilgan avtomobil bilan bir vaqtda ishlab chiqarilgan 37 ta aynan shu markali avtomobillarni 10 kunlik muddatda chaqirtirib olinib, texnik koʻrikdan oʻtkazish yuzasidan bajarilishi majburiy boʻlgan koʻrsatma berilgan. 

Bundan tashqari, murojaat qilgan fuqaroga ayni shunday markali yangi avtomobil almashtirib berilgan hamda isteʼmolchi talab qoʻygan vaqtdan boshlab oʻtkazib yuborilgan har bir kun uchun avtomobil bahosining bir foizi miqdorida neustoyka (penya) toʻlashi toʻgʻrisida qaror qabul qilingan. 

Xabarda maxsus komissiyaning ushbu qaroridan norozi boʻlgan tomon qoʻmitaning Apellyatsiya kengashiga yoki sudga murojaat qilish huquqiga ega ekanligi ham eslatib oʻtilgan.