Tanzila Norboyeva deputatlar nega hokimlarga qarshi gapirmayotganiga qiziqdi

“Koʻp qavatli uylarni oʻrtasiga, bolalar maydonchalari oʻrniga qurilish qilish uchun tadbirkorlarga yer berilishiga hokim va mahalla rozilik bervoryapti.

Aslida mahalla yettiligi, mahalliy deputatlar bunga qarshi turishi kerak. Yetarli kuch bor-ku, axir ularda”, dedi Senat raisi Tanzila Norboyeva.

Oʻzbekiston Senati Vazirlar Mahkamasiga qurilishlarni tartibga solish boʻyicha koʻrilayotgan choralar yuzasidan parlament soʻrovi yubordi. Unda koʻp qavatli uylarga tutash hududlarda oʻzboshimchalik bilan qurilish qilinayotgani va umumiy foydalanish joylarini toʻsib olish kabi holatlar muammo sifatida qayd etilgan.

Maʼlum qilinishicha, 2024 yil va 2025 yilning oʻtgan davri mobaynida koʻp kvartirali uylarning texnik holati bilan bogʻliq 8 mingdan ortiq qonun buzilish holatlari sodir etilgan. Shundan, 431 ta tayanch konstruksiyalar, 2,6 mingta toʻsiq konstruksiyalar buzilgan, 3,3 mingdan ortiq koʻp kvartirali uylarga tutash maydonlarda noqonuniy qurilmalar qurilgan, 1,8 mingdan ortiq umumiy foydalanishdagi joylar oʻzboshimchalik bilan toʻsib olingan.

Qurilish tashkilotlari tomonidan belgilangan qonun va qoidalarga rioya etilmaganligi oqibatida 2024 yil va 2025 yilning oʻtgan davri davomida oʻzboshimchalik bilan qurilgan uy-joy yoki boshqa qurilmalarni buzishga doir fuqarolik sudlarida koʻrilgan 11 mingdan ortiq ishdan 8,3 mingtasi yoki (75 foizi) qanoatlantirilib, noqonuniy qurilmalarni buzish toʻgʻrisida sud qarorlari chiqarilgan.