Eron Isroil foydasiga josuslikda ayblangan shaxsni qatl etdi

Bu haqda Fars News Agency xabar berdi.

Tergov maʼlumotlariga koʻra, Keyvani Isroil harbiylari hamda Mossad razvedka xizmati bilan hamkorlik qilgan. U Eron hududidagi strategik ahamiyatga ega harbiy va xavfsizlik obʼektlarini kuzatish, videoga olish va fotosuratlarni Isroil tomoniga yetkazishda ayblangan.

Maʼlum qilinishicha, ayblanuvchi dastlab internet orqali aloqa oʻrnatgan, keyinchalik bu hamkorlik Yevropa davlatlarida shaxsiy uchrashuvlar shaklida davom etgan.

Hibsga olinishi va jazo ijrosi

Tehron rasmiylariga koʻra, Kurosh Keyvani oʻtgan yilgi “12 kunlik urush” davrida qoʻlga olingan. Hibs vaqtida undan maxsus aloqa vositalari, transport va naqd pul mablagʻlari musodara qilingan.

Eron sud tizimi maʼlumotiga koʻra, oʻlim jazosi Oliy sud tomonidan tasdiqlanib, barcha huquqiy jarayonlar yakunlanganidan soʻng bugun ertalab ijro etilgan.

Mazkur holat Eronning xavfsizlik tahdidlariga nisbatan qatʼiy pozitsiyasini koʻrsatadi. Bu, shuningdek, mamlakat ichida va tashqarisida Isroil bilan har qanday aloqalar ogʻir oqibatlarga olib kelishi mumkinligi haqida ogohlantishdir.