Toshkentda isitish mavsumi yakunlanmoqda

Qayd etilishicha, Vazirlar Mahkamasining 2014-yil 15-iyuldagi "Ko‘p qavatli uylarda issiqlik ta’minoti xizmati ko‘rsatish tartiblari to‘g‘risida"gi 194-son qaroriga ko‘ra, o‘rtacha sutkalik havo harorati ketma-ket besh kun mobaynida 8 darajada saqlanib tursa, isitish mavsumi yakunlanadi.

"O‘zgidromet" ma’lumotlariga ko‘ra, 2025-yilning 8-martdan 14-martgacha bo‘lgan davrda Toshkentda o‘rtacha sutkalik harorat  11,6 (minimal — 9 daraja (8 martda), maksimal — 13,1 daraja (14-martda)) bo‘ladi.

"Shunga asoslanib, Toshkent shahri hokimligi tez orada 2024–2025-yillar uchun isitish mavsumini yopish haqida qaror qabul qiladi. Isitish mavsumi yakunlangach, keyingi mavsumga tayyorgarlik ko‘rish ishlarining muhim bosqichi boshlanadi", deyiladi xabarda.

Qo‘shimcha qilinishicha, isitish mavsumi yakunlanganidan keyin ko‘p qavatli uylarga xizmat ko‘rsatuvchi boshqaruvchi kompaniyalar va UJMShlar mavjud binolarda muhandislik kommunikatsiyalarni keyingi isitish mavsumiga hozirlashni boshlaydi.