Rossiya Dnepr ustidagi ko‘prikka zarba berdi: besh kishi yaralandi

Bu haqda Zaporojye viloyati harbiy ma’muriyati rahbari vazifasini bajaruvchi Mixail Semikin ma’lum qildi.

Uning aytishicha, hujum oqibatida besh kishi jarohatlangan. Ular orasida xizmatga ketayotgan Qizil Xochning ikki xodimi, ikki ayol va bir erkak bor.

Ko‘prik yo‘l qoplamasi shikastlangani sababli transport harakati vaqtincha to‘xtatilgan.

Ukraina Favqulodda vaziyatlar davlat xizmati ma’lumotiga ko‘ra, 5-oktabr kuni kechqurun Zaporojyega uyushtirilgan hujum vaqtida dron to‘qqiz qavatli turar joy binosiga ham urilgan. Binoning beshinchi qavatidagi xonadon va oltinchi qavatdagi balkon yonib ketgan. Ikki kishi jarohatlangan.

Shuningdek, 6-oktabrga o‘tar kechasi Kiyevning Obolon tumanidagi ta’lim muassasasi tomida yong‘in chiqqan. Hodisada jabrlanganlar bo‘lmagan.

Avvalroq Rossiya kuchlari Kiyevdagi Dnepr ustidan o‘tuvchi ko‘priklarga ham ketma-ket zarbalar bergan edi. Rossiya Mudofaa vazirligi mazkur hujumlarni tasdiqlab, ko‘priklar Ukraina armiyasiga Donetsk viloyatidagi qo‘shinlar va harbiy yuklarni yetkazishda foydalanilishini bildirgan.

Ukraina prezidenti Vladimir Zelenskiy avvalroq Rossiya yirik shaharlarga hujumlarni kuchaytirib, ularni mamlakatning boshqa hududlaridan uzib qo‘yishga tayyorlanayotganini aytgan.