Turkiyalik reper Lvbel C5 ga turk adabiyotini o‘rganish sharti qo‘yildi

Sulaymon Burak Bodur (taxallusi Lvbel C5)  Asya Alizade bilan birga kuylagan "Kahpe" nomli qo‘shig‘ining matni yuzasidan olib borilayotgan tergov doirasida qo‘lga olindi. 

Ayblovlarni tan olmadi

Prokuraturada ko‘rsatma bergan Lvbel C5 o‘ziga qo‘yilgan ayblovlarni rad etdi. U qilingan shikoyatlardan xabar topgach, qo‘shiqni barcha raqamli platformalardan olib tashlaganini aytdi. 

Qo‘shiqdagi zo‘ravonlik mazmuniga ega iboralar haqidagi savolga javob berar ekan, san’atkor so‘zlarni xayolot mahsuli sifatida yozganini ta’kidladi.

“Men qo‘shiq so‘zlarini xayol surib yozaman. Bu so‘zlar zamirida hech qanday g‘arazli maqsadim yo‘q. U yerda gap zo‘ravonlik haqida ketmayapti, bular shunchaki yoshlar uchun mo‘ljallangan to‘qima so‘zlar, xolos”.

Bodur qo‘shiqdagi boshqa bahsli so‘zlar o‘zi bilan duet kuylagan Asya Alizadega tegishli ekanligini ta’kidladi va o‘ziga nisbatan qo‘yilgan ayblovlarni rad etdi. 

Prokuratura Bodurni “jinoyat sodir etishga oshkora da’vat qilish” ayblovi bilan hibsga olishni so‘rab, Jinoyat ishlari bo‘yicha sulh sudiga yubordi.

Unga qanday shartlar qo‘yildi?

Ishdagi dalillar holatini va gumonlanuvchining qochib ketish ehtimoli yo‘qligini inobatga olgan sud qamoqqa olish chorasini asossiz deb topdi va talabni rad etdi.

Lvbel C5 ga nisbatan sud nazorati choralarini qo‘llash bo‘yicha qaror qabul qilindi. 

Bodurga mamlakatdan chiqish taqiqlandi hamda haftaning dushanba va chorshanba kunlari politsiya bo‘limiga borib, imzo chekib turish majburiyati yuklatildi.

Reperga nisbatan chiqarilgan qarorda turk adabiyoti bo‘yicha ta’limni davom ettirish sharti ham o‘rin oldi. Qo‘shiq matnlari yuzasidan olib borilgan tergov doirasida chiqarilgan mazkur talab shov-shuvlarga sabab bo‘ldi.