Yangi Toshkent hududida “Peterburg mavzesi”ni barpo etiladi

Oʻzbekiston – Rossiya oʻzaro manfaatli hamkorligini yanada kengaytirish, eng avvalo, Sankt-Peterburg shahri bilan iqtisodiy kooperatsiya loyihalari va madaniy-gumanitar almashinuv dasturlarini amalga oshirish masalalari koʻrib chiqildi.

Oʻzaro tovar ayirboshlash koʻrsatkichlari oʻsayotgani mamnuniyat bilan qayd etildi – oʻtgan yil yakunlariga koʻra hududlar darajasidagi eksport-import hajmi 20 foizga oshdi. Poytaxtimizda Ishbilarmonlik markazi faoliyatini yoʻlga qoʻyish, shuningdek, Yangi Toshkent hududida “Peterburg mavzesi”ni barpo etish loyihasini tayyorlash ishlari olib borilmoqda.

Rossiya delegatsiyasining bu galgi tashrifi chogʻida metallurgiya, uskunasozlik, yoʻl qurilishi, farmatsevtika va sogʻliqni saqlash, oziq-ovqat sanoati, qishloq xoʻjaligi, logistika hamda boshqa sohalarda 23 ta kooperatsiya loyihasini amalga oshirish boʻyicha “yoʻl xaritasi” qabul qilindi.

Xususiy tibbiyot, taʼlim, kommunal xoʻjalik, raqamli texnologiyalar, migratsiya va turizm sohalarida amaliy hamkorlikni kengaytirish boʻyicha aniq takliflar qoʻllab-quvvatlandi.

Faol gumanitar aloqalarni davom ettirish va qoʻshma madaniy tadbirlarni muntazam tashkil etishga alohida eʼtibor qaratildi.

Joriy yil oktabr oyida ikki mamlakat hududlari kengashining ikkinchi yigʻilishini samarali oʻtkazishga qaratilgan chora-tadbirlarni koʻrishga kelishib olindi.