«Biz ularni erkalatib yubordik» — Sergey Mixeyev Markaziy Osiyo davlatlari haqida

27 yanvar kuni «Rossiya 1» telekanali efirida Markaziy Osiyo va Kavkaz davlatlariga nisbatan bahsli bayonotlar yangradi.

Mixeyevning aytishicha, Rossiya koʻp yillar davomida postsovet makonidagi davlatlarni qoʻllab-quvvatlab kelgan, ammo bu ularning «erkalab ketishi»ga olib kelgan. U, shuningdek, postsovet mamlakatlariga nisbatan siyosatni qayta koʻrib chiqish zarurligini taʼkidladi.

Politolog Rossiyaning mehnat migratsiyasi, moliyaviy yordam va boshqa yoʻnalishlarda koʻplab muammolarni hal qilib berganini qayd etib, shunga qaramay Rossiya doim qarzdordek koʻrinayotganini aytdi. Uning fikricha, bunday yondashuv Ukraina bilan bogʻliq hozirgi voqealar sabablaridan biriga aylangan.

Koʻrsatuv davomida Mixeyev Rossiya elchilarining chaqirtirilishiga ham norozilik bildirdi. Suhbatda u Markaziy Osiyo davlatlari «oʻz oʻrnini bilishi kerak», deya taʼkidladi.

Eslatib oʻtamiz, avvalroq jamoatchilik faoli Ruslan Chagayev Rossiya Davlat dumasi deputati Nikolay Valuyevning Markaziy Osiyo davlatlariga nisbatan bayonotlariga javob qaytargani haqida xabar berilgan edi.