Yangilangan Damas va Cobalt ishlab chiqarilishi eʼlon qilindi

UzAuto Motors kompaniyasi Damas va Cobalt’ning yangi versiyalarini ishlab chiqarilishini eʼlon qildi. Unga koʻra, Damas minivenining Damas Move yoʻlovchi versiyasi va Damas Max yuk-yoʻlovchi versiyasi mavjud boʻladi. Cobalt’ning esa Cobalt Style MCM va Cobalt Midnight MCM versiyalari taqdim etiladi.

Qayd etilishicha, yangi Damas oʻlchamlari kattalashadi, yuk koʻtarish qobiliyati va sigʻimi oshadi, shuningdek, haydovchi hamda yoʻlovchilar qulayligi yaxshilanadi. Yangi model ayni paytdagi joriy Damas versiyasi bilan bir vaqtda ishlab chiqariladi.

«Bu esa xaridorlarga sinovdan oʻtgan klassik model hamda zamonaviy texnologik yangiliklarga ega yangi avlod avtomobili oʻrtasida erkin tanlov qilish imkonini yaratadi», — deyiladi xabarda. 

Cobalt’ning yangilangan versiyasida ilgari mavjud boʻlmagan 12 ta yangi opsiya bilan taʼminlanishi maʼlum qilindi. Modernizatsiya jarayonida avtomobilning dvigateli yangilangan, ABS tizimi takomillashtirilgan, shuningdek, dvigatel va uning tizimlarini boshqaruvchi yangi blok oʻrnatilgan.

Bundan tashqari, mijozlar uchun Android Auto va Apple CarPlay‘ni qoʻllab-quvvatlaydigan sensorli multimedia tizimi, kruiz-kontrol tizimi, eko-charmdan qilingan oʻrindiqlar, old oʻrindiqlarning isitish funksiyasi, yangi asboblar paneli hamda multimedia va kruiz-kontrolni boshqarish tugmalari bilan jihozlangan rul, shuningdek, intererning yangi dekorativ elementlari kabi bir qancha yangi opsiyalar mavjud boʻladi. Jami 50 dan ortiq asosiy avtomobil komponentlari yangilandi.

«Cobalt modelini rivojlantirishning keyingi bosqichi esa avtomobilning tashqi koʻrinishini (feyslift) oʻzgartirish boʻlib, UzAuto Motors mutaxassislari bu yoʻnalishda ishlarni allaqachon boshlashgan», — deydi kompaniya.

Avtomobillarning narxlari hamda sotuv boshlanishi sanalari boʻyicha batafsil maʼlumot keyinchalik eʼlon qilinadi.

Eslatib oʻtamiz, Shavkat Mirziyoyevning 2025 yil may oyida Xorazm viloyatiga tashrifi davomida «Xorazm Avto» korxonasida 100 mln dollar hisobiga bozorda katta talabga ega arzon avtomobil ishlab chiqarishi aytilgandi.