Ал-Шараа Трампнинг Ғазо режасини "жиддий жиноят" дея баҳолади

Бундан бир неча кун олдин Трамп АҚШ урушдан вайрон бўлган Ғазо секторини ўз назоратига олишини ва фаластинликлар бошқа жойга кўчирилгач, уни иқтисодий жиҳатдан ривожлантиришини маълум қилган эди. 

Ал-Шараага кўра, фаластинликлар Трампнинг режасига биноан Ғазога қайтиш ҳуқуқига эга бўлмайди.

"Мен ишонаманки, ҳеч бир куч халқни ўз юртидан қувиб чиқаролмайди. Кўплаб давлатлар буни амалга оширишга уринган, аммо уларнинг барчаси муваффақиятсизликка учраган, айниқса сўнгги бир ярим йил ичида Ғазада бўлиб ўтган урушда бу яққол кўриниб турибди", дейди у.

Шунингдек, у Трампнинг фаластинликларни ўз юртидан мажбуран чиқариш ташаббусини на оқилона, на ахлоқий ва сиёсий жиҳатдан тўғри деб ҳисоблашини билдирган.

"Бу можарога 80 йилдан ошди ва фаластинликларни сиқиб чиқариш бўйича барча уринишлар муваффақиятсизликка учради. Кимки ўз юртини тарк этган бўлса, бу қароридан афсусланган. Ҳар бир авлод ўз юртига эгалик қилиш нақадар муҳимлигини англаб етмоқда", дея қўшимча қилган у.

Бундан ташқари, Миср, Иордания ва бошқа араб давлатлари фаластинликларнинг чегарани кесиб ўтишига кескин қарши чиқмоқда. 

Уларга кўра, ҳар қандай оммавий кўчирилиш икки давлатли ечим, яъни Исроил ёнида Фаластин давлати барпо этилиши истиқболларини янада заифлаштиради ва араб давлатларини оғир оқибатлар билан юзлаштиради.