Ғазодаги урушни “геноцид” деб атаган жарроҳ АҚШ Конгрессига номзод бўлди

АҚШ армиясининг Ироқ ва Ғазода хизмат қилган вакили, шунингдек, 11 сентябрь терактларида жабрланган қутқарувчиларни даволаган травматолог жарроҳ сешанба куни Ню-Жерси штатининг 12-конгресс округи учун Демократик партиядан номзодликни қўлга киритди.

Асли келиб чиқиши мисрлик бўлган Адам Ҳамавий 3 ноябрда бўлиб ўтадиган умумий сайловларда Республикачилар партияси праймеризи ғолиби Грег Мелени мағлуб этиши кутилмоқда.

Бу округ демократлар учун “ишончли” ҳудуд ҳисобланади. 2024 йил ноябрдаги президентлик сайловларида демократ Камала Ҳаррис Ню-Жерси штатининг 12-конгресс округида Доналд Трампни 23 фоизлик фарқ билан ортда қолдирган эди.

“Ғазода геноцид содир бўлмоқда”

2024 йилда Ҳамавий Ғазода жабр кўрган тинч аҳолига тиббий ёрдам кўрсатиш учун кўнгилли бўлиб борди.

“Мен гувоҳ бўлган нарса уруш эмас, урушдан-да анча даҳшатли эди. Мен илгари бундай миқёсдаги қирғинни кўрмаганман. Уни фақат геноцид деб аташим мумкин”, — деди у сешанба куни.

Бу гаплар эса Исроил тарафдори бўлган сайловчиларнинг ғазабини қўзғатди.

Ҳамавийни сенатор қўллаб-қувватлади

Ҳамавийнинг АҚШ армиясидаги хизмати ва бир қанча ҳарбий можароларда, жумладан, Ироқда америкаликларга тиббий ёрдам кўрсатгани унинг сайловдаги ғалабасининг асосий омилларидир.

Унинг ютуқлари қаторига Иллинойс штатидан демократ сенатор Тамми Даквортнинг ҳаётини сақлаб қолишга ёрдам бергани ҳам киради. Дакворт 2004 йилда Ироқдаги жанглар пайтида ўзининг “Black Hawk” вертолётига ракета гранатаси келиб урилиши оқибатида иккала оёғидан айрилган эди.

Иллинойс штатидан Конгрессга, сўнгра Сенатга сайланган Дакворт Ню-Жерсидаги сайловда Ҳамавий номзодини қўллаб-қувватлади.

Ҳамавий истеъфога чиқаётган амалдаги конгрессвумен Бонни Уотсон Коулманнинг ўрнига номзодликни қўлга киритиш учун Демократлар партиясидан бўлган бошқа 12 нафар рақибини мағлуб этди.