Кушнер: ҲАМАС қуролсизланмагунча Ғазо тикланмайди

АҚШ махсус вакили Жаред Кушнер ҲАМАС қуролсизланмагунча Ғазони қайта тиклашга йўл қўйилмаслигини билдирди.

Кушнер Fox News телеканалига берган интервьюсида АҚШнинг Ғазони қайта қуриш режаси борлигини, аммо ҳудудни қуролсизлантириш амалга оширилмагунча тиклаш ишлари бошланмаслигини айтди.

«Биз Ғазони қайта қуриш режасига эгамиз, аммо қуролсизлантириш амалга оширилмагунча Ғазони қайта тиклашга йўл қўймаймиз», — деди Кушнер.

Унинг таъкидлашича, ҲАМАС қуролларини топшириши ва туннелларини йўқ қилиши керак. Кушнер бу жараён 60–90 кун ичида амалга оширилиши мумкинлигини билдирди.

АҚШ махсус вакили, шунингдек, Исроилнинг ўзини ҳимоя қилиш ҳуқуқи чекланмаслигини таъкидлади.

Айни пайтда Исроил Ғазога зарбалар беришда давом этмоқда. Al Jazeera маълумотига кўра, ўт очишни тўхтатиш кучга кирганидан кейин ҳам Ғазода камида 1265 киши ҳалок бўлган.

Трамп эса 17 август куни Исроилнинг Ғазога зарбаларини тўхтатишга чақирган. АҚШ президентининг айтишича, ҲАМАС қуролларини ташлашга рози бўлган.

Кушнер 16 август куни ҲАМАС вакиллари билан ҳам камёб учрашув ўтказган. У музокараларни «жуда самимий» деб атаган, аммо Вашингтон ҲАМАСни кейинги ҳаракатларига қараб баҳолашини билдирган.