Колумбия Исроилнинг Голан тепаликларига даъвосини тан олди

Колумбия Исроилнинг ишғол қилинган Сурия ҳудуди — Голан тепаликлари устидан суверенитет даъвосини тан олган иккинчи давлат бўлди. Бу қарор ўта ўнг қарашлари билан танилган президент Абелардо де ла Эсприелла ҳокимиятга келганидан бир неча кун ўтиб эълон қилинди.

Исроил Ташқи ишлар вазири Гидеон Саар Колумбия президентини «яхши дўсти» деб атаб, қарорни тарихий қадам сифатида олқишлади. Унинг айтишича, икки давлат вакиллари бу масалани де ла Эсприелланинг инаугурациясидан бир кун олдин Барранкилья шаҳрида келишиб олган.

Исроил 1967 йилги Олти кунлик уруш даврида Голан тепаликларининг катта қисмини Суриядан эгаллаб олган. 1981 йилда эса ҳудудни бир томонлама аннексия қилган. Бу қарор халқаро ҳамжамиятнинг аксарияти томонидан тан олинмаган.

АҚШ 2019 йилда, Дональд Трамп президентлигининг биринчи даврида, Исроилнинг Голан тепаликлари устидан даъвосини расман тан олган эди. Шу тариқа Колумбия мазкур позицияни тан олган иккинчи давлатга айланди.

Бироқ БМТ Голан тепаликларини Сурия ҳудуди сифатида тан олади. БМТ Бош котиби Антониу Гутерриш ҳам ўтган ойда ушбу позицияни яна бир бор тасдиқлаб, Исроилнинг ҳудудни ишғол қилиши «мутлақо қабул қилиб бўлмайдиган» ҳолат эканини билдирган.

Колумбиянинг янги президенти Абелардо де ла Эсприелла сайловолди кампанияси даврида АҚШ ва Исроил билан яқин муносабатларни тиклашга ваъда берган эди.

Унинг ҳокимиятга келиши собиқ президент Густаво Петро сиёсатида кескин бурилиш ясади. Петро Исроилнинг Ғазодаги урушини кескин танқид қилган, Исроил билан дипломатик алоқаларни узган ва Исроилдан қурол-яроғ импортини тўхтатган эди.

Де ла Эсприелла эса Петронинг ишғол қилинган Ғарбий соҳилдаги Рамаллоҳ шаҳрида Колумбия элчихонасини очиш режасини ҳам бекор қилди.