Андижонда яширин дори цехи аниқланди

Қайд этилишича, жорий йилнинг 30 январь куни Давлат хавфсизлик хизматининг Наманган вилояти бўйича бошқармаси ходимлари томонидан божхона органлари билан ҳамкорликда тезкор тадбир ўтказилган. Тадбир давомида Чортоқ туманидаги тез тиббий ёрдам фельдшери ўзининг яшаш хонадонидан "Cobalt" русумли автомашинада чиқиб кетаётган вақтда тўхтатилган. 

Автомашина салони кўздан кечирилганда, ичида ҳеч қандай ҳужжатлари бўлмаган 1000 дона "Зодак" дори воситаси топилган. Текширув давомида маълум бўлишича, фельдшер ушбу дориларни сотиш мақсадида Андижон вилоятига юбормоқчи бўлган. 

Шунингдек, унинг яшаш хонадони кўздан кечирилганда, дори воситалари ишлаб чиқариш учун мўлжалланган яширин цех аниқланган. Цехда сотишга тайёрлаб қўйилган 763 дона "Анаферон", 2125 дона "Зодак", 4000 дона "Витамин Б6" дори воситалари, 570 дона номсиз флаконларда сироплар ва дори препаратларини қадоқлашда фойдаланилган флаконлар, пластик қопқоқ ва пробкалар топилган. 

Фельдшер дори воситаларини тайёрлаш ва сақлаш учун ўзининг 1977 йилда туғилган опаси ва 1974 йилда туғилган қариндошини жалб қилган. Опасининг яшаш манзилидан ҳам 120 дона "Зодак", 260 дона "Анаферон", 96 дона "Хилак Форте" ва 313 дона номсиз флаконларга солинган сироп дори воситалари топилган. 

Мазкур шахсларга жиноят иши қўзғатилиб, тергов давомида тез ёрдам фельдшерини дори воситалари тайёрлашда керак бўладиган этикетка, флакон, қопқоқ ва пробкалар билан таъминлаб келган Андижон шаҳрида яшовчи 1991 йилда туғилган ҳамтовоғи борлиги ҳам аниқланган. 

Шунингдек, Қўқон шаҳрида истиқомат қилувчи, 1986 йилда туғилган фуқаронинг яшаш хонадонида ўтказилган тинтув-тергов ҳаракати давомида, тез ёрдам фельдшеридан сотиб олинган, умумий қиймати 27 млн 646 минг 800 сўмлик 150 дона "Зодак" ва 146 дона "Хилак Форте" дори воситалари протсессуал тартибда расмийлаштириб олинган. 

Тергов жараёнида қўлбола усулда тайёрланган дори воситаларининг олди-сотдисига Чортоқ туманида яшовчи, 1994 йилда туғилган тиббиёт йўналишидаги давлат олий таълим муассасасининг талабаси ҳам алоқадор экани маълум бўлган. Ушбу яширин цехда тайёрланган дори воситалари асосан Андижон ва Қўқон шаҳарларида сотувга чиқарилган. 

Жиноят ишлари бўйича Янгиқўрғон туман суди томонидан мазкур шахсларга Жиноят кодексининг 186-прим 3-моддасида назарда тутилган жиноятларни содир этганликда айбдор деб топилиб, Чортоқ туман тез тиббий ёрдам фельдшери ва уни хом-ашё билан таъминлаб турган, Андижон шаҳрида яшовчи фуқарога 5 йил 6 ой муддатга озодликдан маҳрум қилиш жазоси тайинланган. 

Қолган 4 нафар шахснинг ҳар бири икки йил муддатга озодликдан маҳрум этилган. Ашёвий далил сифатида олинган барча дори воситалари эса тегишли тартибда йўқ қилинган.