Andijonda yashirin dori sexi aniqlandi

Qayd etilishicha, joriy yilning 30 yanvar kuni Davlat xavfsizlik xizmatining Namangan viloyati boʻyicha boshqarmasi xodimlari tomonidan bojxona organlari bilan hamkorlikda tezkor tadbir oʻtkazilgan. Tadbir davomida Chortoq tumanidagi tez tibbiy yordam feldsheri oʻzining yashash xonadonidan "Cobalt" rusumli avtomashinada chiqib ketayotgan vaqtda toʻxtatilgan. 

Avtomashina saloni koʻzdan kechirilganda, ichida hech qanday hujjatlari boʻlmagan 1000 dona "Zodak" dori vositasi topilgan. Tekshiruv davomida maʼlum boʻlishicha, feldsher ushbu dorilarni sotish maqsadida Andijon viloyatiga yubormoqchi boʻlgan. 

Shuningdek, uning yashash xonadoni koʻzdan kechirilganda, dori vositalari ishlab chiqarish uchun moʻljallangan yashirin sex aniqlangan. Sexda sotishga tayyorlab qoʻyilgan 763 dona "Anaferon", 2125 dona "Zodak", 4000 dona "Vitamin B6" dori vositalari, 570 dona nomsiz flakonlarda siroplar va dori preparatlarini qadoqlashda foydalanilgan flakonlar, plastik qopqoq va probkalar topilgan. 

Feldsher dori vositalarini tayyorlash va saqlash uchun oʻzining 1977 yilda tugʻilgan opasi va 1974 yilda tugʻilgan qarindoshini jalb qilgan. Opasining yashash manzilidan ham 120 dona "Zodak", 260 dona "Anaferon", 96 dona "Xilak Forte" va 313 dona nomsiz flakonlarga solingan sirop dori vositalari topilgan. 

Mazkur shaxslarga jinoyat ishi qoʻzgʻatilib, tergov davomida tez yordam feldsherini dori vositalari tayyorlashda kerak boʻladigan etiketka, flakon, qopqoq va probkalar bilan taʼminlab kelgan Andijon shahrida yashovchi 1991 yilda tugʻilgan hamtovogʻi borligi ham aniqlangan. 

Shuningdek, Qoʻqon shahrida istiqomat qiluvchi, 1986 yilda tugʻilgan fuqaroning yashash xonadonida oʻtkazilgan tintuv-tergov harakati davomida, tez yordam feldsheridan sotib olingan, umumiy qiymati 27 mln 646 ming 800 soʻmlik 150 dona "Zodak" va 146 dona "Xilak Forte" dori vositalari protsessual tartibda rasmiylashtirib olingan. 

Tergov jarayonida qoʻlbola usulda tayyorlangan dori vositalarining oldi-sotdisiga Chortoq tumanida yashovchi, 1994 yilda tugʻilgan tibbiyot yoʻnalishidagi davlat oliy taʼlim muassasasining talabasi ham aloqador ekani maʼlum boʻlgan. Ushbu yashirin sexda tayyorlangan dori vositalari asosan Andijon va Qoʻqon shaharlarida sotuvga chiqarilgan. 

Jinoyat ishlari boʻyicha Yangiqoʻrgʻon tuman sudi tomonidan mazkur shaxslarga Jinoyat kodeksining 186-prim 3-moddasida nazarda tutilgan jinoyatlarni sodir etganlikda aybdor deb topilib, Chortoq tuman tez tibbiy yordam feldsheri va uni xom-ashyo bilan taʼminlab turgan, Andijon shahrida yashovchi fuqaroga 5 yil 6 oy muddatga ozodlikdan mahrum qilish jazosi tayinlangan. 

Qolgan 4 nafar shaxsning har biri ikki yil muddatga ozodlikdan mahrum etilgan. Ashyoviy dalil sifatida olingan barcha dori vositalari esa tegishli tartibda yoʻq qilingan.