Сулҳ ва алмашинувга умид - Истанбул учрашувининг асосий натижалари

"Ҳозир об-ҳаво иссиқ, бу эса эпидемиялар хавфини кучайтиради. Шу сабабли, биз гуманитар танаффус учун имкон яратишни истаймиз.

Яширмаймиз, Россия армияси ҳозир ҳужум қилмоқда, ва “кулранг зона”да кўпроқ украин ҳарбийларининг жасадлари қолган. Украина ҳарбийлари бу таклифни кўриб чиқишга ваъда берди", — деди Россия делегацияси раҳбари Владимир Мединский музокаралардан кейинги матбуот анжуманида.

Музокараларда, шунингдек, ҳарбий асирларни алмашиш масаласи ҳам муҳокама қилинди. Мединскийга кўра, томонлар уруш бошланганидан бери энг йирик асирлар алмашувини ўтказишга келишиб олди. Ҳар икки тараф оғир ярадор ва касал асирларни озод қилади. Шунингдек, ёш ҳарбийлар бўйича "барчасини барчасига" формуласига асосан ўзаро алмашинув амалга оширилади. Ҳар бир томондан камида минг нафардан асир озод қилиниши режалаштирилган.

Оғир ярадорларни доимий равишда алмашиш учун тиббий комиссиялар тизими йўлга қўйилиши кўзда тутилган.

Музокараларда яна бир муҳим мавзу — украиналик болаларни қайтариш масаласи бўлди. Мединский Россия илк бор Украина томонидан расмий 339 нафар бола исми келтирилган рўйхатни олганини маълум қилди. Унинг айтишича, илгари "ўғирлаб кетилган болалар" сони асоссиз равишда ошириб кўрсатилган, аслида эса бу болалар жанговар ҳаракатлар зоналаридан эвакуация қилинган вояга етмаганлар бўлиб, қариндошлик алоқалари аниқлангач, оилаларига қайтарилган.

Украина томони эса Россия делегацияси 10 нафар болани 10 июлгача қайтаришни таклиф қилганини билдирди. Шунингдек, "Axios" нашрининг хабарига кўра, Россия яна бир бор Украинага ўзининг "тинчлик меморандумини" топширди. Унда Москва аввалгидек, Украина қўшинларини ўз назоратидаги ҳудудлардан олиб чиқишни талаб қилмоқда.