Жаҳон чемпионати юрак хуружига олиб келиши мумкин - тадқиқот

Жаҳон чемпионати бошланар экан, кардиологлар юрак хасталикларига чалинган ишқибозларни огоҳлантирмоқда: ўйинларнинг ҳаддан ташқари ҳаяжонли кечиши юрак-қон томир тизимига жиддий зўриқиш келтириши мумкин.

“Миллий жамоасининг кейинги босқичга чиққанидан қаттиқ қувониш ёки шиддатли пенальтилар сериясини ҳаяжон билан томоша қилиш каби кучли ҳиссий ҳолатлар юрак касаллиги бор инсонлар учун хавфли оқибатларга олиб келиши эҳтимоли юқори”, — деди кардиолог Паола Санталучия Euronews нашрига.

“Гипертония, семизлик ёки чекиш каби бошқа хавф омиллари мавжуд бўлган кишилар ҳам ҳиссиётларга бой ўйинлар пайтида эҳтиёткор бўлишлари керак”, — дея қўшимча қилди у.

Кучли ҳиссий ҳаяжон юрак уриш тезлиги, қон босими ва кортизол каби стресс гормонларини ошириши мумкин. Баъзи ҳолларда юрак дақиқасига 150 мартагача тез уради — бу тез югуриш билан қиёсланадиган даража.

Ушбу хавфлар яқинда ўтказилган тадқиқот натижаларига кўра аниқланди. Унда тақиладиган қурилмалар ёрдамида 2025-йилги Германия кубоги финали пайтидаги футбол ҳаяжони — юрак уриш тезлиги ва стресс даражаси ўлчаниб, 12 ҳафта давомидаги оддий кунларда олинган кўрсаткичлар билан таққосланган.

Ҳатто уйдан туриб томоша қилганларда ҳам сезиларли физиологик ўзгаришлар кузатилди.

Энг кучли физиологик реакциялар нафақат голлар пайтида, балки ноаниқлик лаҳзаларида, пенальтилар сериясида ёки тўпнинг дарвоза устунига тегиши каби вазиятларда юзага келади.

Айб футболда эмас

Муаммо футболнинг ўзида эмас. Аксинча, бу тананинг кучли ҳис-туйғуларга бўлган реакциясидир.

“Адренергик стимулятсия энг юқори чўққисига чиқади: қон босими ва юрак уриш тезлиги кескин ошиб, адреналин ҳамда кортизол миқдори кўтарилиб кетади — бу кескин ҳолат юзага келиши учун мос вазиятдир”, — деди Норвегиянинг Осло университети кардиология профессори Ден Атар.

Баъзи кишиларда организмнинг бундай реакцияси артерия деворларида тўпланган ёғ қатламининг ёрилиб, юрак хуружига олиб келишига сабаб бўлиши мумкин.

Футбол ўйинини томоша қилишнинг ҳеч қандай хавфи йўқ. Буларнинг барчаси физиологик ҳолат. Ҳаяжонланиш хавфли эмас.

Шунчаки, олимлар ҳиссий зўриқиш, спиртли ичимликлар истеъмоли, иссиқ ҳаво ва юрак-қон томир касалликлари биргаликда кутилмаган нохуш ҳодисага олиб келиши мумкинлигидан огоҳлантиришмоқда.