Windows 12 қачон чиқади?

Microsoft компанияси Windows 11 операцион тизимининг навбатдаги йирик янгиланиши устида иш олиб бормоқда.

Фан-технология

11.11.2026, 12:00

Улашиш:

Internet Google

Бироқ у кутилганидек Windows 12 эмас, балки Windows 11’нинг 27H2 версияси бўлиши мумкин. Бу ҳақда PCWorld нашри хабар берди.

Нашрнинг ёзишича, Microsoft яқинда Windows 11’нинг 26H2 версиясини тақдим этди. Бироқ мазкур янгиланиш фойдаланувчилар кутганчалик катта ўзгаришларни олиб келмади. Унда янги функциялар нисбатан кам бўлгани сабабли операцион тизимнинг келгуси ривожланиш йўналишига қизиқиш ортган.

BetaNews нашри маълумотларига таяниб хабар беришича, Microsoft 2027 йил учун Windows’нинг навбатдаги версиясини ишлаб чиқмоқда. У Windows 12 эмас, балки 27H2 номи остида чиқарилиши кутилмоқда.

27H2 қандай ўзгаришларни олиб келади?

Номи ошкор этилмаган манбалар маълумотига кўра, Windows 11’нинг 27H2 версияси операцион тизимни кенг кўламда қайта ишлашни назарда тутади. Янгиланишнинг асосий эътибори «сифат» кўрсаткичини оширишга қаратилади.

Тахминларга кўра, 27H2 ҳажми ва қамрови жиҳатидан икки йил аввал тақдим этилган Windows 11 24H2 янгиланишига яқин бўлиши мумкин. Бу эса Microsoft операцион тизимнинг муҳим таркибий қисмларини қайта кўриб чиқиши, такомиллаштириши ёки айримларини бутунлай алмаштириши эҳтимолини англатади.

Ҳозирча айнан қайси компонентлар ўзгартирилиши ҳақида аниқ маълумот йўқ.

Windows 12 қачон чиқади?

Microsoft компанияси Windows 11’нинг 27H2 версияси ёки 2027 йилдаги бошқа янгиланишлар ҳақида ҳозирча расмий маълумот бермаган. Шу сабабли бу хабарлардаги маълумотларга эҳтиёткорлик билан ёндашиш лозим.

Айрим экспертлар Microsoft ҳозирча Windows 12 номидан фойдаланишга шошилмаётганини тахмин қилмоқда. Бунга янги операцион тизим номи билан боғлиқ юқори кутилмалар ва компания зиммасига тушиши мумкин бўлган босим сабаб бўлиши эҳтимол.

Шу сценарий амалга ошса, Windows 11 келгуси йилларда ҳам босқичма-босқич такомиллаштириб борилади. Microsoft эса тизимни ривожлантиришда фойдаланувчилар ҳамжамиятининг фикр-мулоҳазаларига кўпроқ эътибор қаратишни режалаштираётгани айтилмоқда.

Янги ёндашув компания кутган натижани бериши ёки бермаслиги эса вақт ўтиши билан маълум бўлади.