Фарғонада маст фуқаро ИИБ ходимини пичоқлади

Қайд этилишича, воқеа жорий йилнинг 26 август куни соат 20:45 ларда Фарғона вилояти Данғара туманида содир бўлган. Унда туманнинг ИИБ профилактика катта инспектори Н.М. ўзининг ваколати дорисида Жиноят кодексининг 276-моддаси 1-қисми билан судланиб, 18:00 дан соат 06:00 га қадар яшаш жойини тарк этмаслик билан уй қамоғида сақланаётган Х.Э. ни текширишга борган.

“Текширув давомида мазкур шахс хонадонида бўлмаган. Сўнгра маст ҳолатда уйига кириб келиб, бақир-чақир қилиб, жанжал кўтарган. Кейин хонадонда бўлган ошхона пичоғини олиб чиқиб, кутилмаганда Н.М.нинг кўкрак қафасига санчиб, унга оғир тан жароҳати етказган ҳамда воқеа жойидан қочиб кетган”, дейилади хабарда.

Профилактика инспектори эса кўрсатилган тиббий ёрдамга қарамасдан шифохонада вафот этган.

Шундан сўнг инспекторни пичоқлаган шахс қўлга олинган. Унга нисбатан Жиноят кодексининг 97-моддаси 2-қисми билан жиноят иши қўзғатилиб, қамоққа олиш тарзидаги эҳтиёт чораси қўлланилган.