Fargʻonada mast fuqaro IIB xodimini pichoqladi

Qayd etilishicha, voqea joriy yilning 26 avgust kuni soat 20:45 larda Fargʻona viloyati Dangʻara tumanida sodir boʻlgan. Unda tumanning IIB profilaktika katta inspektori N.M. oʻzining vakolati dorisida Jinoyat kodeksining 276-moddasi 1-qismi bilan sudlanib, 18:00 dan soat 06:00 ga qadar yashash joyini tark etmaslik bilan uy qamogʻida saqlanayotgan X.E. ni tekshirishga borgan.

“Tekshiruv davomida mazkur shaxs xonadonida boʻlmagan. Soʻngra mast holatda uyiga kirib kelib, baqir-chaqir qilib, janjal koʻtargan. Keyin xonadonda boʻlgan oshxona pichogʻini olib chiqib, kutilmaganda N.M.ning koʻkrak qafasiga sanchib, unga ogʻir tan jarohati yetkazgan hamda voqea joyidan qochib ketgan”, deyiladi xabarda.

Profilaktika inspektori esa koʻrsatilgan tibbiy yordamga qaramasdan shifoxonada vafot etgan.

Shundan soʻng inspektorni pichoqlagan shaxs qoʻlga olingan. Unga nisbatan Jinoyat kodeksining 97-moddasi 2-qismi bilan jinoyat ishi qoʻzgʻatilib, qamoqqa olish tarzidagi ehtiyot chorasi qoʻllanilgan.