Футбол аҳлининг ярмини йиғлатган кунга 3 йил тўлди

Мессини клубдан кетиши ҳақидаги норасмий хабарлар тарқалганда, мухлисларни ушлаб турган ягона нарса "ҳали ҳеч нарса аниқ бўлмади", деган ўй эди. Бора-бора бу хабарлар дунёнинг машҳур нашрларида кўриниш берди. Шунда ҳам мухлислар дастлаб ишонмади, аммо вақт ўтиб клуб томонидан эълон қилинган расмий хабар кўпчиликни довдиратиб қўйгани аниқ. 

Қандай қабул қилсин, ахир? 2005 йилдан бери кўз ўнгида улғайган йигит. Бу деярли бир боланинг туғилиб катта бўлишигача ўтган вақтга тенг дегани. Лео жамоа сафида ўтган ўн беш йиллик даврда хоҳ у "Барселона" мухлиси бўлсин, хоҳ бошқа, футболга қизиқиши бўлган инсон бордирки, ҳамманинг ёқимтойи бўлиб улгурган эди. 

Унгача жамоага кимлар келиб, кимлар кетмади. Мессининг ўрнини ҳеч қайси бир юлдуз боса олмасди. Шу учундирки футболчининг жамоадан кетадиган вақти келгани футбол аҳлининг тасаввурига сиғмас эди. Севимли жамоаси билан асрий рақобат қилиб келган, фавқулодда иккинчи томоннинг ҳам совринларини ўзиники қилиб олган Мессининг кетиши, ҳатто "Реал Мадрид" мухлисларида ҳам афсус билан қарши олинди. 

Чунки Роналду, Барселонадаги Месси ҳаммани ўзига ўргатиб қўйган эди. Буларнинг биринчиси эсланганда, албатта, иккинчиси ҳам тилга олинар эди. Мессининг жамоа сафидаги статистикасининг ўзи унинг қандай даҳо эканидан далолат бериб турарди. Футболчи жамоа сафида 778 та ўйинда 672 та гол ва 305 та голли узатмани амалга оширган. У 37 ёшигача қўлга киритган олтин тўпларининг 7 тасини бир клубдаги фаолияти давомида ўзиники қилган. 

Бир вақтнинг ўзида олтин тўпга асосий номзод сифатида киритилган 3 футболчи ҳам "Барселона"га тегишли. Айтмоқчи бўлганим, Леонинг қўлга киритган натижалари ҳам шу клуб билан боғлиқ. Шундай экан Месси клуб учун ягона бўлса, клуб ҳам Месси учун ягона бўлиб қолади. Бугун у жамоа билан хайрлашганига 3 йил бўлди. Аммо ҳалиям жамийки футбол мухлиси "Барселона" деганда кўз ўнгида Месси гавдаланади, Месси деганда "Барселона". 2021 йил 5 август ҳалиям ёдимда. Бутун Каталония кўз ёш тўккан эди ўшанда. Ҳа, футбол баъзида шундай адолатсиз ва шундай шафқат билмайди. 

Мухлислар севимли жамоасидан, севимли футболчисини кетгани учунмас, балки у яқин орада футбол билан бутунлай хайрлашиши мумкинлигини ўйлаб чидаёлмагандир, деб ўйлайман. Очиғи "Барселона" мухлиси бўлмасам ҳам, шу томони мени ранжитган эди. Биздан кейинги мухлис авлодига қайсидир маънода ачинаман. Чунки улар фақатгина бу инсоннинг буюк футболчи бўлганлигини кимдандир эшитишади, балки видеоларда кўришар, у ҳақда бир қанча фильмлар ишлашар. Мен эса фарзандларимга қўрқмасдан мақтана оламан, унинг ўйини кўриб катта бўлганман дея!

Муаллиф: Темур Сувонов