Futbol ahlining yarmini yigʻlatgan kunga 3 yil toʻldi

Messini klubdan ketishi haqidagi norasmiy xabarlar tarqalganda, muxlislarni ushlab turgan yagona narsa "hali hech narsa aniq boʻlmadi", degan oʻy edi. Bora-bora bu xabarlar dunyoning mashhur nashrlarida koʻrinish berdi. Shunda ham muxlislar dastlab ishonmadi, ammo vaqt oʻtib klub tomonidan eʼlon qilingan rasmiy xabar koʻpchilikni dovdiratib qoʻygani aniq. 

Qanday qabul qilsin, axir? 2005 yildan beri koʻz oʻngida ulgʻaygan yigit. Bu deyarli bir bolaning tugʻilib katta boʻlishigacha oʻtgan vaqtga teng degani. Leo jamoa safida oʻtgan oʻn besh yillik davrda xoh u "Barselona" muxlisi boʻlsin, xoh boshqa, futbolga qiziqishi boʻlgan inson bordirki, hammaning yoqimtoyi boʻlib ulgurgan edi. 

Ungacha jamoaga kimlar kelib, kimlar ketmadi. Messining oʻrnini hech qaysi bir yulduz bosa olmasdi. Shu uchundirki futbolchining jamoadan ketadigan vaqti kelgani futbol ahlining tasavvuriga sigʻmas edi. Sevimli jamoasi bilan asriy raqobat qilib kelgan, favqulodda ikkinchi tomonning ham sovrinlarini oʻziniki qilib olgan Messining ketishi, hatto "Real Madrid" muxlislarida ham afsus bilan qarshi olindi. 

Chunki Ronaldu, Barselonadagi Messi hammani oʻziga oʻrgatib qoʻygan edi. Bularning birinchisi eslanganda, albatta, ikkinchisi ham tilga olinar edi. Messining jamoa safidagi statistikasining oʻzi uning qanday daho ekanidan dalolat berib turardi. Futbolchi jamoa safida 778 ta oʻyinda 672 ta gol va 305 ta golli uzatmani amalga oshirgan. U 37 yoshigacha qoʻlga kiritgan oltin toʻplarining 7 tasini bir klubdagi faoliyati davomida oʻziniki qilgan. 

Bir vaqtning oʻzida oltin toʻpga asosiy nomzod sifatida kiritilgan 3 futbolchi ham "Barselona"ga tegishli. Aytmoqchi boʻlganim, Leoning qoʻlga kiritgan natijalari ham shu klub bilan bogʻliq. Shunday ekan Messi klub uchun yagona boʻlsa, klub ham Messi uchun yagona boʻlib qoladi. Bugun u jamoa bilan xayrlashganiga 3 yil boʻldi. Ammo haliyam jamiyki futbol muxlisi "Barselona" deganda koʻz oʻngida Messi gavdalanadi, Messi deganda "Barselona". 2021 yil 5 avgust haliyam yodimda. Butun Kataloniya koʻz yosh toʻkkan edi oʻshanda. Ha, futbol baʼzida shunday adolatsiz va shunday shafqat bilmaydi. 

Muxlislar sevimli jamoasidan, sevimli futbolchisini ketgani uchunmas, balki u yaqin orada futbol bilan butunlay xayrlashishi mumkinligini oʻylab chidayolmagandir, deb oʻylayman. Ochigʻi "Barselona" muxlisi boʻlmasam ham, shu tomoni meni ranjitgan edi. Bizdan keyingi muxlis avlodiga qaysidir maʼnoda achinaman. Chunki ular faqatgina bu insonning buyuk futbolchi boʻlganligini kimdandir eshitishadi, balki videolarda koʻrishar, u haqda bir qancha filmlar ishlashar. Men esa farzandlarimga qoʻrqmasdan maqtana olaman, uning oʻyini koʻrib katta boʻlganman deya!

Muallif: Temur Suvonov