1 апрелдан нақд тўловлар улуши камайтирилади

Бу ҳақда Солиқ қўмитаси раиси ўринбосари Жаҳонгир Абдиев нақдсиз тўлов тизимини ривожлантиришга бағишланган матбуот анжуманида маълум қилди.

Унинг айтишича, янгиланаётган тартибнинг асосий мақсади — аҳоли томонидан амалга ошириладиган тўловларда нақдсиз ҳисоб-китоблар улушини камида 75 фоизга етказишдан иборат.

Шу мақсадда босқичма-босқич чоралар жорий этилмоқда. Аввал электр энергияси, газ ва давлат хизматлари каби соҳаларда бошланган рақамлаштириш жараёни эндиликда савдо ва хизмат кўрсатиш соҳаларига ҳам кенгайтирилмоқда.

«Бугун рақамлаштириш келажак эмас, балки кундалик ҳаётимизнинг бир қисми. У нафақат қулайлик, балки шаффофлик ва молиявий хавфсизликни ҳам таъминлайди», — деди Абдиев.

Маълум қилинишича, янги тартибларга кўра, 1 апрелдан бошлаб 28 минг турдаги маҳсулот бўйича нақд пулда ҳисоб-китоб қилиш чекланади. Бу умумий савдо айланмасининг тахминан 7 фоизини ташкил этади.

Шунингдек, мазкур ўзгаришлар фирибгарлик ҳолатларининг олдини олиш, фуқаролар маблағларини ҳимоя қилиш ва электрон тўловларни кенг жорий этишга хизмат қилиши кутилмоқда.