“ALHADAYA” биологик фаол қўшимчаси рекламаси учун молиявий жарима қўлланилди

Ижтимоий тармоқларда кенг муҳокамаларга сабаб бўлган “Alhadaya” биологик фаол қўшимчаси рекламаси юзасидан тегишли ўрганиш ишлари олиб борилди.

Текширув натижаларига кўра, реклама материалларида таъсир хусусиятига эга бўлмаган иборалар қўллангани, маҳсулот тўғрисида тўлиқ маълумот берилмагани ҳамда унинг терапевтик самарадорлиги ва касалликларни енгиллаштириши ҳақидаги даъволар келтирилгани аниқланган. 

Маълум қилинишича, “Реклама тўғрисида”ги Қонуннинг 35-моддасига мувофиқ, овқатга қўшиладиган биологик фаол қўшимчалар рекламаси дори воситаси сифатида талқин қилинишига йўл қўймаслиги, даволаш хусусиятлари ҳақида тасаввур уйғотмаслиги ҳамда рағбатлантирувчи акциялар билан тарғиб этилмаслиги шарт.

Қўмита Махсус комиссияси томонидан қонун талаблари бузилгани аломатлари билан “ALHADAYA NEW” МЧЖга нисбатан иш қўзғатилди. Ишни кўриб чиқиш якунларига кўра, компанияга молиявий жарима қўллаш тўғрисида қарор қабул қилинган.

Шунингдек, аниқланган қонунбузилишларни бартараф этиш ва бундай ҳолатларга келгусида йўл қўймаслик юзасидан мажбурий кўрсатма берилган.