Британия Ўзбекистоннинг тўрт компаниясига нисбатан санкциялар жорий этди

Лондон мазкур бизнес субъектларини Россия билан иқтисодий ҳамкорлик қилганликда гумон қилмоқда.

Британия Ғазначилиги ҳужжатларига кўра, 18 декабрдан бошлаб ушбу компанияларнинг активлари музлатилиб, уларга нисбатан молиявий чекловлар жорий этилган.

Санкциялар рўйхатига киритилган Ўзбекистон компаниялари қуйидагилар:

• Фарғона кимё заводи;
• Gelion Business Trade МЧЖ (Тошкент);
• Chemistry International МЧЖ ҚК (Навоий);
• Raw Materials Cellulose МЧЖ (Жиззах).

Британия расмийларига кўра, ушбу компаниялар Украина ҳудудидаги урушда фойдаланилиши мумкин бўлган товарлар ёки технологияларни Россияга етказиб берган бўлиши эҳтимоли билан текширув остига олинган. Бироқ ҳозирча қўшимча тафсилотлар очиқланмаган.

Янгиланган санкциялар рўйхатидан Қирғизистоннинг Бишкек шаҳрида рўйхатдан ўтган «Кифико» компанияси ҳам ўрин олган. Лондон ушбу компанияни молия соҳасидаги фаолияти орқали Россия ҳукуматини қўллаб-қувватлаганликда айбламоқда.

Шунингдек, айрим жисмоний шахсларга нисбатан ҳам чекловлар жорий этилди. Британия Ғазначилиги маълумотларига кўра, ушбу рўйхатда Ўзбекистон, Исроил ва Россия фуқаролигига эга бўлган тадбиркор Рустам Мўминов ҳам бор. Аввалроқ Украина ҳам унга нисбатан санкциялар қўллаган эди.

Қайд этилишича, Рустам Мўминов Фарғона кимё заводига эгалик қилувчи компания асосчиси ҳисобланади.