Ҳормуздаги ҳужумлар нефть қазиб олиш ҳажмига таъсир этдими?

Ҳормуз бўғозида кемаларга ҳужумлар давом этаётганига қарамай, ишлаб чиқариш тикланмоқда.

OPEC+нинг чоршанба куни эълон қилинган ойлик ҳисоботига кўра, ташкилот октябрь ойида кунига ўртача 41,23 миллион баррел нефть қазиб олган. Бу сентябрь ойидаги кўрсаткичдан 2,04 миллион баррелга кўп. 2025 йилда, уруш бошланишидан олдин эса кунлик ишлаб чиқариш ўртача 41,98 миллион баррелни ташкил этган.

Ишлаб чиқариш ҳажмининг тикланишига асосан Форс кўрфази мамлакатлари ҳисса қўшган. Иккиламчи манбалар маълумотларига кўра, Саудия Арабистонида нефть қазиб олиш кунига 1,18 миллион баррелга ошиб, 9,19 миллион баррелга етган. Бироқ Ар-Риёд ўз ҳисоботида бу кўрсаткични 10,56 миллион баррел деб келтирган.

Ироқда кунлик ишлаб чиқариш 496 минг баррелга ошиб, 4,49 миллион баррелни ташкил этган. Қувайт эса қазиб олиш ҳажмини 232 минг баррелга кўпайтирган.

Бирлашган Араб Амирликларида нефть ишлаб чиқариш кунига 4 миллион баррелдан ошган. Бу 2025 йилдаги ўртача 3,17 миллион барреллик кўрсаткичдан анча юқори.

Айни пайтда Эронда нефть қазиб олиш яна камайиб, кунига 1,91 миллион баррелни ташкил этган. Ўтган йили бу кўрсаткич ўртача 3,26 миллион баррел бўлган.

Ҳисоботда таъкидланишича, февраль ойидан сентябрь ойигача давом этган уруш оқибатида жаҳон нефть захиралари 537 миллион баррелга камайган. Октябрь ойида нефть ташувчи танкерлар учун фрахт нархлари рекорд даражага етган. Энг йирик нефть ташувчи кемалар учун ташиш тарифлари бир йил аввалгига нисбатан 10 баравардан кўпроқ ошган.

Бу жараёнлар Ҳормуз бўғозидаги кескинлик сақланиб қолаётган бир пайтда юз бермоқда. Эрон шу ҳафта яна бир нечта танкер денгиз миналарига дуч келганини маълум қилди. Теҳрон бўғоздан ўтувчи кемалар Эрон кучлари билан мувофиқлаштирилган ҳолда ҳаракатланиши кераклигини билдирмоқда.