Ар-Риёд аэропортига уюштирилган ҳужумларда 3 нафар Қироллик фуқароси ҳалок бўлди

Саудия Арабистони фуқаро авиацияси бошқармаси хабар беришича, 8 октябрь куни Ар-Риёдда жойлашган Қирол Холид номидаги халқаро аэропортга қилинган иккита ҳужум оқибатида 3 нафар Саудия фуқароси ҳалок бўлган, яна бир неча киши жароҳатланган. Бу ҳақда Reuters нашри ёзди.

Биринчи ҳужумда аэропорт иншоотларига, иккинчисида эса Саудия Арабистонининг Saudia давлат авиакомпаниясига тегишли самолётга зарба берилган.

Аэропорт фаолияти қайта тикланиб, авиақатновлар одатий тартибга қайтгани қўшимча қилинди.

Томонларнинг баёнотлари

Ямандаги Эроннинг прокси кучи сифатида таърифланадиган ҳусийлар пайшанба куни аэропортга иккита қанотли ракета билан ҳужум қилганини билдирди. Шунингдек, гуруҳ жануби-ғарбийдаги Нажрон шаҳри аэропортини (бу даъво Саудия расмийлари томонидан тасдиқланмаган) ҳамда Хамис-Мушайт шаҳридаги авиабазани баллистик ракеталар билан нишонга олганини айтди.

Ҳусийларнинг билдиришича, улар Яманда қайта авж олган фуқаролар урушида ҳукумат кучларини қўллаб-қувватлаётгани сабабли қиролликка ҳужум қилмоқда.

Саудия Арабистони эса БМТ томонидан тан олинган Яман ҳукумати ҳудудларини ҳусийлардан қайтариб олиш ҳаракатларига кўмаклашаётганини айтмоқда.

Аввалроқ Туркия Макка мудофаа пакти доирасида Саудия Арабистонида ҳарбий база қуришини хабар қилгандик.