G7 давлатлари ҳусийларни Саудия Арабистонига ҳужумларни тўхтатишга чақирди

G7 – Буюк Британия, Канада, Франция, Германия, Италия, Япония ва АҚШ ташқи ишлар вазирлари Ямандаги ҳусийларнинг Саудия Арабистонига қарши давом этаётган ҳужумларини қоралади.

Вазирлар бу баёнотни душанба куни Нью-Йоркда БМТ Бош Ассамблеяси доирасида ўтказилган норасмий учрашувдан сўнг эълон қилди.

Улар ҳусийларни барча ҳарбий ҳаракатлар, таҳдидлар ва фуқаролик кемаларига қарши ҳужумларни зудлик билан тўхтатишга, шунингдек, сиёсий жараёнга жиддий ёндашишга чақирди.

G7 давлатлари Эронни ҳам ҳусийларга қурол етказиб бериш ва уларни қўллаб-қувватлашни тўхтатишга чақирди. Вазирлар Теҳроннинг гуруҳни қўллаб-қувватлаши аввалги БМТ Хавфсизлик Кенгаши резолюцияларига зид эканини таъкидлади.

Баёнотда Эроннинг ҳусийларни қўллаб-қувватлаши кескинликнинг хавфли кучайишига олиб келаётгани, халқаро савдога зарар етказиши ва глобал беқарорликни кучайтириши мумкинлиги қайд этилган.

Ямандаги сўнгги кескинлашув 2022 йилда Эрон билан яқин алоқадаги ҳусийлар ва Саудия Арабистони қўллаб-қувватлаган Яман ҳукумати ўртасида БМТ воситачилигида эришилган ўт очишни тўхтатиш келишувидан кейинги нисбий осойишталик давридан сўнг юз берди.