Ислом тараққиёт банки Ўзбекистон йўллари ва мактаблари учун 160 млн доллар ажратади

Мазкур келишувлар Саудия Арабистонида бўлиб ўтган AIUla конференцияси доирасида Ислом тараққиёт банки президенти Муҳаммад Ал-Жассер ҳамда Ўзбекистон Бош вазири ўринбосари — иқтисодиёт ва молия вазири Жамшид Қўчқоров томонидан имзоланди.

Автомобиль йўлларини реконструкция қилиш лойиҳаси учун 70 миллион доллар ажратилади. Ушбу маблағлар ҳисобидан Жиззах вилоятида 143 км ҳудудий автомобиль йўли ҳамда 30 км маҳаллий ва қишлоқ йўллари таъмирланади. Лойиҳа 200 мингдан ортиқ аҳоли учун транспорт хавфсизлиги ва ҳаракат қулайлигини оширишга қаратилган.

SmartEd лойиҳаси учун эса 94 миллион доллардан ортиқ маблағ йўналтирилади. Лойиҳа доирасида 58 та янги мактаб қурилиб, мавжуд таълим муассасаларида 2 400 дан ортиқ синф хоналари ташкил этилади. Ушбу ташаббус ҳар йили тахминан 73 минг нафар ўқувчи ҳамда 36 мингдан ортиқ педагог ва маъмурий ходимлар учун фойда келтиради.

Ислом тараққиёт банки Ўзбекистон билан ҳамкорликни янада кенгайтириш ва мамлакатнинг ижтимоий ҳамда инфратузилма соҳаларидаги муҳим лойиҳаларни қўллаб-қувватлашда давом этишини маълум қилди.