Жаҳон банки Ўзбекистонга 800 миллион долларлик имтиёзли кредит ажратади

Ушбу маблағлар мамлакатда камбағалликни қисқартириш, иқтисодий рақобатни кучайтириш ва стратегик тармоқларда ислоҳотларни амалга ошириш учун йўналтирилади.

Жаҳон банкининг дастури доирасида қуйидаги йўналишлар бўйича ишлар амалга оширилади:

Ижтимоий ҳимоя

Кам таъминланган оилалар учун электр, иссиқлик ва газ тарифларининг ўсиши оқибатларини юмшатиш мақсадида бир марталик ёрдам пули 270 минг сўмдан 1 миллион сўмгача оширилади.

Аҳолининг заиф қатламлари учун хусусий ва нодавлат ташкилотлар орқали ижтимоий хизматлар бозори ривожлантирилади.

Аёллар ҳуқуқлари ва иқтисодий имкониятлари

Иш жойидаги зўравонлик ва камситишларга қарши ҳуқуқий асослар кучайтирилади.

Иш берувчиларга аёлларни ҳомиладорлиги ёки фарзанди борлиги сабабли ишга олмаслик ёки ишдан бўшатиш тақиқланади.

Иқтисодиёт ва хусусий сектор

Ўзбекистон Миллий инвестиция жамғармаси ташкил этилиб, давлат корхоналарини самарали бошқариш ва босқичма-босқич хусусийлаштириш жараёнлари йўлга қўйилади.

Телерадио ва интернет бозорида рақобатни ошириш, давлат компанияларининг устунлигини чеклаш мақсадида мустақил телекоммуникация регулятори фаолияти йўлга қўйилади.

Қишлоқ хўжалиги

Фермерлар учун қишлоқ хўжалиги хавфларини суғурталаш тизими жорий этилади.

Паxta нархини белгилашнинг бозорга мослашувчан механизми йўлга қўйилади ҳамда тўқимачилик корхоналари фермерлардан хом ашёни тўғридан-тўғри сотиб олиш имконига эга бўлади.

Халқаро савдо ва рақобат

Жаҳон савдо ташкилотига аъзо бўлиш жараёни тезлаштирилади.

Экспорт тартиби соддалаштирилади, айрим товарлар учун рухсатномалар бекор қилинади.

Энергетика, нефть-газ, кимё ва қишлоқ хўжалигидаги эксклюзив имтиёзлар бекор қилинади.

Энергетика ва “яшил” ислоҳотлар

Хусусий инвесторлар учун электр энергиясини тақсимлаш бозори очилади.

Қайта тикланадиган энергия ишлаб чиқарувчиларга истеъмолчига тўғридан-тўғри сотиш ҳуқуқи берилади.

Энергия самарадорлигини ошириш ва иссиқхона газларини камайтириш учун янги рағбат тизимлари жорий этилади.

Энергия самарадорлиги миллий агентлиги ташкил этилади ҳамда “яшил” давлат харидлари тизимига экологик мезонлар киритилади.

Жаҳон банкининг таъкидлашича, бу кредитлар узоқ муддатли ва паст фоизли бўлиб, халқаро молия бозорларига нисбатан анча қулай шартларда тақдим этилади. Шу тариқа Ўзбекистон қарз хизматини тежаш ва маблағларни ижтимоий ҳамда иқтисодий устувор йўналишларга йўналтириш имконига эга бўлади.