Jahon banki Oʻzbekistonga 800 million dollarlik imtiyozli kredit ajratadi

Ushbu mablagʻlar mamlakatda kambagʻallikni qisqartirish, iqtisodiy raqobatni kuchaytirish va strategik tarmoqlarda islohotlarni amalga oshirish uchun yoʻnaltiriladi.

Jahon bankining dasturi doirasida quyidagi yoʻnalishlar boʻyicha ishlar amalga oshiriladi:

Ijtimoiy himoya

Kam taʼminlangan oilalar uchun elektr, issiqlik va gaz tariflarining oʻsishi oqibatlarini yumshatish maqsadida bir martalik yordam puli 270 ming soʻmdan 1 million soʻmgacha oshiriladi.

Aholining zaif qatlamlari uchun xususiy va nodavlat tashkilotlar orqali ijtimoiy xizmatlar bozori rivojlantiriladi.

Ayollar huquqlari va iqtisodiy imkoniyatlari

Ish joyidagi zoʻravonlik va kamsitishlarga qarshi huquqiy asoslar kuchaytiriladi.

Ish beruvchilarga ayollarni homiladorligi yoki farzandi borligi sababli ishga olmaslik yoki ishdan boʻshatish taqiqlanadi.

Iqtisodiyot va xususiy sektor

Oʻzbekiston Milliy investitsiya jamgʻarmasi tashkil etilib, davlat korxonalarini samarali boshqarish va bosqichma-bosqich xususiylashtirish jarayonlari yoʻlga qoʻyiladi.

Teleradio va internet bozorida raqobatni oshirish, davlat kompaniyalarining ustunligini cheklash maqsadida mustaqil telekommunikatsiya regulyatori faoliyati yoʻlga qoʻyiladi.

Qishloq xoʻjaligi

Fermerlar uchun qishloq xoʻjaligi xavflarini sugʻurtalash tizimi joriy etiladi.

Paxta narxini belgilashning bozorga moslashuvchan mexanizmi yoʻlga qoʻyiladi hamda toʻqimachilik korxonalari fermerlardan xom ashyoni toʻgʻridan-toʻgʻri sotib olish imkoniga ega boʻladi.

Xalqaro savdo va raqobat

Jahon savdo tashkilotiga aʼzo boʻlish jarayoni tezlashtiriladi.

Eksport tartibi soddalashtiriladi, ayrim tovarlar uchun ruxsatnomalar bekor qilinadi.

Energetika, neft-gaz, kimyo va qishloq xoʻjaligidagi eksklyuziv imtiyozlar bekor qilinadi.

Energetika va “yashil” islohotlar

Xususiy investorlar uchun elektr energiyasini taqsimlash bozori ochiladi.

Qayta tiklanadigan energiya ishlab chiqaruvchilarga isteʼmolchiga toʻgʻridan-toʻgʻri sotish huquqi beriladi.

Energiya samaradorligini oshirish va issiqxona gazlarini kamaytirish uchun yangi ragʻbat tizimlari joriy etiladi.

Energiya samaradorligi milliy agentligi tashkil etiladi hamda “yashil” davlat xaridlari tizimiga ekologik mezonlar kiritiladi.

Jahon bankining taʼkidlashicha, bu kreditlar uzoq muddatli va past foizli boʻlib, xalqaro moliya bozorlariga nisbatan ancha qulay shartlarda taqdim etiladi. Shu tariqa Oʻzbekiston qarz xizmatini tejash va mablagʻlarni ijtimoiy hamda iqtisodiy ustuvor yoʻnalishlarga yoʻnaltirish imkoniga ega boʻladi.