Ҳиндистон 500 миллион кишини камбағалликдан чиқарди

Мамлакатда ўта қашшоқлик даражаси шу даврда 27,1 фоиздан 2,6 фоизгача пасайган.

Ҳисоботда камбағаллик даражаси кунига 3 доллардан кам маблағ билан яшайдиган аҳоли улуши асосида баҳоланган. Жаҳон банкининг маълумотларига кўра, кунига 4,20 доллардан кам маблағ билан яшайдиган аҳоли улуши ҳам 2011 йилдаги 57,7 фоиздан 2023 йилда 16,1 фоизга тушган. Бу мезон бўйича 496 миллион киши камбағалликдан чиққан.

Жаҳон банки мутахассислари бу натижаларни камбағалликни қисқартириш борасидаги сезиларли ютуқ сифатида баҳолаган. Уларга кўра, бундай ўзгаришга аҳоли истеъмолининг ўсиши, айниқса аёллар ўртасида бандликнинг ошиши ҳамда озиқ-овқат субсидиялари каби ижтимоий ёрдам дастурларининг кенгайиши ҳисса қўшган.

Ҳиндистонда камбағалликка қарши курашиш дастурлари бир неча ҳукумат даврида амалга оширилган. Собиқ бош вазир Манмохан Сингҳ қишлоқ аҳолиси учун йилига камида 100 кунлик иш билан таъминлаш кафолатини берувчи дастурни йўлга қўйган. 2014 йилда ҳокимиятга келган Нарендра Моди ҳукумати эса тўғридан-тўғри пул ўтказмалари, бепул озиқ-овқат маҳсулотлари ва уй-жой билан таъминлаш дастурларини кенгайтирган.

Ҳозирда Ҳиндистонда тахминан 800 миллион киши давлат томонидан бепул озиқ-овқат маҳсулотлари билан таъминланади. Шунингдек, қишлоқ жойларда ичимлик суви тармоғига уланган хонадонлар улуши 2019 йил августдаги 17 фоиздан 80 фоиздан зиёдга етган.

Бироқ камбағалликнинг қисқариши мамлакатдаги иқтисодий тенгсизлик муаммосини ҳал қилмаган. 2026 йилги Жаҳон тенгсизлик ҳисоботига кўра, Ҳиндистонда аҳолининг энг юқори даромадли 10 фоизи миллий даромаднинг қарийб 58 фоизини олади. Энг кам даромадли 50 фоиз аҳоли ҳиссаси эса атиги 15 фоизни ташкил этади.

Иқтисодчилар тенгсизликнинг кучайишини иқтисодий ўсиш самаралари аҳоли ўртасида бир хил тақсимланмаётгани билан изоҳлайди. Шунингдек, сифатли таълим ва тиббий хизматдан фойдаланиш имкониятларидаги фарқлар ҳам ижтимоий тафовутни кучайтирмоқда.

Жаҳон банки ҳисоботида камбағаллик қисқаргани қайд этилган бўлса-да, кунига 4,20 доллардан кам маблағ билан яшаётган 233 миллион киши ҳали ҳам мавжуд. Айрим иқтисодчилар бепул озиқ-овқат дастурининг узоқ муддатли молиявий барқарорлиги ва аҳолининг овқатланиш сифатига таъсири юзасидан ҳам саволлар борлигини таъкидламоқда.

Ҳиндистонда камбағалликни янада қисқартириш учун иқтисодий ўсиш билан бирга соғлиқни сақлаш ва таълим соҳаларига давлат инвестицияларини кўпайтириш, шунингдек, даромадларни қайта тақсимлаш механизмларини такомиллаштириш зарур.