Европа Иттифоқи Ғазо учун 1 миллиард долларлик ёрдам дастурини ишга туширди

Европа комиссияси Фаластин хайриячилари гуруҳи йиғилишининг иккинчи мажлисини ўтказди. Унда Европа комиссиясининг Ўрта ер денгизи масалалари бўйича комиссари Дубравка Шуитса ва Фаластин маъмурияти бош вазири Муҳаммад Мустафо раислик қилди.

Брюсселда бўлиб ўтган йиғилишга қарийб 65 та делегация ташриф буюрди. Унда Ғазо учун янги ташаббус расман ишга туширилди ҳамда Фаластин маъмуриятининг ислоҳотлар дастури муҳокама қилинди.

Европа Комиссияси 15 ҳамкор билан биргаликда Ғазога 883,6 миллион евро (1 миллиард доллар) миқдорида ёрдам кўрсатиш ташаббусини йўлга қўйганини маълум қилди.

Кимлар молиялаштирмоқда?

Мазкур ташаббусда Испания, Дания, Буюк Британия, Германия, Норвегия, Финландия, Италия, Нидерландия, Франция, Япония, Швейтсария, Швеция ва Белгия ҳукуматлари иштирок этмоқда. 

Шунингдек, Европа комиссияси, Европа инвестиция банки ва Жаҳон банки ҳам лойиҳага қўшилган. Австралия ва Канада эса ташаббусга қўшилиш истагини билдирган.

Ушбу ташаббус Европа Иттифоқи, Бирлашган Миллатлар Ташкилоти ва Жаҳон банки томонидан 2026 йил апрель ойида эълон қилинган “Ғазодаги зарар ва эҳтиёжларни тезкор баҳолаш” ҳисоботига асосланади.

Ёрдам маблағлари нималарга йўналтирилади?

Лойиҳанинг мақсади сув таъминоти ва канализация инфратузилмаси, қурилиш чиқиндилари ва қаттиқ маиший чиқиндиларни бошқариш, шунингдек, соғлиқни сақлаш, энергетика, қишлоқ хўжалиги ва озиқ-овқат тизимлари каби асосий хизматларни қайта тиклашга қаратилган лойиҳаларни мувофиқлаштиришдир.

1994 йилдан буён Европа Иттифоқи Фаластинга қарийб 30 миллиард евро миқдорида ёрдам кўрсатган.