Қозоғистон экспортининг 95 фоизи АҚШнинг янги божларидан озод этилди

Бу ҳақда мамлакат Савдо ва интеграция вазирлиги маълум қилди.

Вазирлик изоҳига кўра, 12,5 фоизлик янги бож фақат айрим турдаги Қозоғистон маҳсулотларига татбиқ этилади. АҚШ Савдо вакили бошқармаси (USTR) томонидан истиснолар рўйхатига киритилган товарлар эса ушбу чекловдан озод қилинган.

Шунингдек, аввал амал қилган 10 фоизлик вақтинчалик импорт устамаси 150 кунлик муддати тугагани сабабли бекор бўлган ва янги бож билан қўшиб ҳисобланмайди.

Қозоғистон Савдо вазирлиги АҚШ билан маҳаллий экспортчилар манфаатларини ҳимоя қилиш ва ўзаро мақбул ечим топиш бўйича музокараларни давом эттираётганини маълум қилди.

Эслатиб ўтамиз, АҚШ 23 июль куни 1974 йилда қабул қилинган Савдо тўғрисидаги қонуннинг 301-моддаси доирасида ўтказилган текширув якунларини эълон қилди. Унга мувофиқ, 24 июл 2026 йилдан бошлаб 60 давлат, жумладан Қозоғистон маҳсулотларига нисбатан 10 ёки 12,5 фоизлик қўшимча импорт божлари жорий этилди.

Вашингтон хулосасига кўра, Қозоғистон ҳам мажбурий меҳнат орқали ишлаб чиқарилган маҳсулотлар импортини тақиқлаш ёки бу тақиққа риоя этиш бўйича етарли чора кўрмаган давлатлар қаторига киритилган. Шу сабабли мамлакат маҳсулотларининг айрим турларига 12,5 фоизлик бож белгиланди.

Янги тарифлар нефть, газ, минерал ўғитлар ва айрим озиқ-овқат маҳсулотлари каби қатор товарларга нисбатан қўлланилмайди. АҚШ маъмуриятининг таъкидлашича, ушбу чоралар мамлакат савдо сиёсати ва мажбурий меҳнат орқали ишлаб чиқарилган маҳсулотларга қарши кураш доирасида қабул қилинган.