Санкт-Петербургдаги байрамга қариндошини юборган мансабдорларга чора кўрилди

2025 йил июнь ойида Россиянинг Санкт-Петербург шаҳрида ўтказилган “Алые паруса” (“Алвон елканлар”) битирувчилар байрамига Самарқанд вилоятидан ўқувчилар танлов асосида эмас, балки таниш-билишчилик орқали юборилгани аниқланди.

Маълум бўлишича, Россия томонидан таклифнома вилоят ҳокимлигига юборилган ва у вилоят мактабгача ва мактаб таълими бошқармасига йўналтирилган. Натижада саккиз нафар ўқувчи ва икки нафар ўқитувчи тадбирда иштирок этган.

Текширувлар давомида юборилган ўқувчилардан икки нафари бошқарма бошлиғининг фарзанди ва жияни, яна икки нафари бошқарма ҳисобчиси ва методистининг фарзандлари экани маълум бўлган. Шунингдек, яна бир ўқувчи бошқарма бошлиғининг яқин танишининг ўғли экани аниқланган.

Ўқувчиларнинг фестивалга бориб-келиши учун маҳаллий бюджетдан 95 миллион сўм маблағ ажратилган.

Ҳолат юзасидан масъул мансабдор шахсларга нисбатан тегишли чоралар кўрилгани маълум қилинди.