Тошкент халқаро аэропорти автотураргоҳлари аукционга қўйилди

Гап умумий майдони 40 минг квадрат метрдан ортиқ бўлган 6 та автотураргоҳ (P1, P3, P4, P5, P7, P8) ҳақида кетмоқда. Уларнинг умумий сиғими қарийб 1,5 мингта автомобиль ўрнини ташкил этади.

Асосий шартлар ва талаблар

Автотураргоҳлар 3 йил муддатга ижарага берилади. Лойиҳа доирасида инфратузилмани тўлиқ ривожлантириш ва модернизация қилиш талаб этилади.

Асосий талаблар қуйидагилардан иборат:

• автотураргоҳларни тўлиқ рақамлаштириш;
• автоматлаштирилган бошқарув тизимини жорий этиш;
• автомобил рақамларини аниқлаш тизими;
• шлагбаумлар ўрнатиш;
• онлайн ва қулай тўлов усулларини йўлга қўйиш;
• жойларни брон қилиш имкониятига эга мобил иловани ишга тушириш.

Шунингдек, оператор автотураргоҳларни туну кун ишлатиш, уларни қўриқлаш ва хизмат кўрсатиш, реконструкция ва кенгайтириш ишларига сармоя киритиш мажбуриятини олади.

Молиявий шартлар

Ижара тўлови икки қисмдан иборат бўлади:

• кимошди савдосида аниқланадиган қатъий тўлов;
• тушумнинг 5 фоизи миқдорида ўзгарувчан тўлов.

Бошланғич қиймат йилига 48,7 млрд сўм этиб белгиланган. Савдолар давомида нарх камида 5 фоизга ошириб борилади.

Қўшимча қулайликлар

Лойиҳа амалга оширилгандан сўнг:

• рақамли навигация;
• бўш жойлар ҳақида электрон таблолар;
• қўшимча тўлов имкониятлари;
• электромобиллар учун қувватлаш станциялари йўлга қўйилиши режалаштирилмоқда.

Аукцион 2026 йил 19 май кунига белгиланган.