Исроил армияси Яман пойтахтига бир қатор ҳаво зарбалари йўллади

Исроил армияси Яманнинг «Ансаруллоҳ» (ҳусийлар) ҳаракати назоратидаги пойтахти Сана шаҳрига 10 дан ортиқ ҳаво зарбасини берди. Бу ҳақда «Ал-Масира» телеканали хабар берди.

«Анадолу» агентлиги маълумотларига кўра, зарбалар ҳусийлар етакчиси Абдулмалик ал-Ҳусий нутқ сўзлаётган вақтда амалга оширилган. Пойтахтнинг бир нечта туманларида кучли портлашлар содир бўлган. Исроилнинг KAN давлат телеканали хабар беришича, зарбаларнинг мақсади ҳусийлар ҳаракатининг «муҳим шахслари» бўлган.

Исроил армиясининг расмий баёнотида айтилишича, ҳаво зарбалари Яман пойтахтидаги ҳусийларга тегишли объектларга қаратилган.

Исроил мудофаа вазири Исроил Кац армиянинг бошқарув марказидан шахсан операцияни кузатгани ҳақида вазирлик маълум қилди.

Кац таъкидлашича, Эрон қўллаб-қувватлаётган ҳусийларга Исроил томонидан бир неча бор огоҳлантириш берилган. «Кимки Исроилга қарши қўл кўтарса, оғир оқибатларга дуч келади», — деди вазир.

Ҳозирча ҳаво зарбалари оқибатида ҳалок бўлганлар ёки яраланганлар ҳақида маълумот йўқ.