Исроил Ғарбий Соҳилда янги қурилиш режасини маъқуллади

Тель-Авив маъмурияти оккупация қилинган Ғарбий ЯСоҳилнинг шимолида жойлашган Қафр Қадум қишлоғидаги 3,5 гектар Фаластин ерини тортиб олишни кўзда тутадиган янги қурилиш режасини маъқуллади.

Фаластинни озод этиш ташкилоти (ФОТ)га қарашли “Девор (шармандалик девори) ва яҳудий аҳоли пунктларига қарши кураш кенгаши” вакили Муниф Наззол расмий баёнот билан чиқди.

Фаластин ахборот агентлиги WAFA хабарига кўра, Наззол шундай деди:

“Мустамлакачи Исроил оммавий ахборот воситаларида эълон қилган режага мувофиқ, Қафр Қадум қишлоғининг шимолидаги 10-участкада 3,5 гектар ер мусодара қилинади”.

Унинг таъкидлашича, мазкур режа Қафр Қадум қишлоғи ерларида қурилган ноқонуний исроиллик аҳоли пункти — “Мецпе Йешай”ни кенгайтириш ва унга 58 та янги турар жой қўшишни кўзда тутади.

БМТ Исроилнинг оккупация қилинган Фаластин ҳудудларидаги аҳоли пункти фаолияти халқаро ҳуқуққа зид эканини ва бу ҳаракат икки давлатли ечим имкониятини йўққа чиқараётганини таъкидлаб келади.

Исроил молия вазири Бецалель Смотрич ўтган ой Тель-Авив ҳукумати Ғарбий Соҳил ҳудудининг 82 фоизини Исроил таркибига қўшишни режалаштираётганини ва “Фаластин давлати тузилишига йўл қўймаслик зарур”лигини айтган эди.