Исроил Байрутдаги қурол омборига зарба берди

Исроил Мудофаа кучларининг (IDF) Telegram-каналида ёзилишича, IDF'нинг разведка кўрсатмаси билан "Ҳизбуллоҳ" ташкилотига тегишли стратегик қуролларга зарба берилган. Бу қуроллар "Ҳизбуллоҳ" томонидан Байрутдаги асосий таянч бўлган Даҳиэҳ ҳудудидаги ер ости омборида тўпланган. 

"98-дивизия Ливан жанубида "Ҳизбуллоҳ" нишонлари ва ҳудуддаги инфратузилмасига қарши чекланган, маҳаллийлаштирилган ва оператив фаолиятни давом эттирмоқда. Ўтган кун давомида қўшинлар ўзаро отишма ва ҳаво зарбалари давомида ўнлаб ҳарбийларни йўқ қилди. Қўшинлар кўплаб қурол-яроғларни, жумладан, Исроил шимолидаги жамоаларга қаратилган миномёт ва танкка қарши ракета отиш мосламаларини, граната ва қўшимча ҳарбий техникани аниқлади", дейилади хабарда.

Исроилнинг Байрутга ҳужуми оқибатида "Ҳизбуллоҳ"нинг 140 дан ортиқ нишонларига ҳаводан зарбалар берилган. Қурол-яроғ омборлари, Исроил ҳудудига қаратилган ракеталар, инфратузилма шулар жумласидан.

"Бундан ташқари, Исроил Мудофаа кучларининг Ғазо сектори шимолида жойлашган ҲАМАСнинг Ҳаво кучлари қўмондони Маҳмуд ал-Мабҳуҳни йўқ қилди", дейилган хабарда.

"Al Jazeera" мухбири Имрон Хоннинг ёзишича, Исроил томонидан артиллерия отишмалари ҳали ҳам давом этмоқда. Исроил "Ҳизбуллоҳ"нинг 140 та нишони урганидан сўнг 36 соат ичида Ливан жануби ҳудудида 340 га яқин ҳаво ва артиллерия ҳужумлари амалга оширилган.

"Бироқ, "Ҳизбуллоҳ" томонидан уларга қарши кураш олиб борилаётгани ҳақида маълумот берилмаган. Улар 24 соат олдин Исроилнинг дронини уриб туширишга муваффақ бўлганликларини айтишди, аммо бу ҳам ҳали тасдиқланмаган хабар", дейди у.

Бу кунги можародан аввал, яъни 15 октябрь куни "Ҳизбуллоҳ" Исроил шимолидаги Далтон, Дишон, Яфтаҳ ва Сафед шаҳарларига бир кечада тўртта ракета ҳамда 50 га яқин снаряд ҳужумини амалга оширганди. Шундан сўнг Исроил шимолидаги Сафед ва унинг атрофидаги ҳудудларда сиреналар янграган. 

Исроил мудофаа кучларига кўра, снарядларнинг бир қисми тутиб олинган. Исроиллик ҳарбийлар Ливандан учирилган иккита дрон қулагани ҳақида хабар берган. Қурбонлар ҳақида маълумот очиқланмаган.