Isroil Bayrutdagi qurol omboriga zarba berdi

Isroil Mudofaa kuchlarining (IDF) Telegram-kanalida yozilishicha, IDF'ning razvedka koʻrsatmasi bilan "Hizbulloh" tashkilotiga tegishli strategik qurollarga zarba berilgan. Bu qurollar "Hizbulloh" tomonidan Bayrutdagi asosiy tayanch boʻlgan Dahieh hududidagi yer osti omborida toʻplangan. 

"98-diviziya Livan janubida "Hizbulloh" nishonlari va hududdagi infratuzilmasiga qarshi cheklangan, mahalliylashtirilgan va operativ faoliyatni davom ettirmoqda. Oʻtgan kun davomida qoʻshinlar oʻzaro otishma va havo zarbalari davomida oʻnlab harbiylarni yoʻq qildi. Qoʻshinlar koʻplab qurol-yarogʻlarni, jumladan, Isroil shimolidagi jamoalarga qaratilgan minomyot va tankka qarshi raketa otish moslamalarini, granata va qoʻshimcha harbiy texnikani aniqladi", deyiladi xabarda.

Isroilning Bayrutga hujumi oqibatida "Hizbulloh"ning 140 dan ortiq nishonlariga havodan zarbalar berilgan. Qurol-yarogʻ omborlari, Isroil hududiga qaratilgan raketalar, infratuzilma shular jumlasidan.

"Bundan tashqari, Isroil Mudofaa kuchlarining Gʻazo sektori shimolida joylashgan HAMASning Havo kuchlari qoʻmondoni Mahmud al-Mabhuhni yoʻq qildi", deyilgan xabarda.

"Al Jazeera" muxbiri Imron Xonning yozishicha, Isroil tomonidan artilleriya otishmalari hali ham davom etmoqda. Isroil "Hizbulloh"ning 140 ta nishoni urganidan soʻng 36 soat ichida Livan janubi hududida 340 ga yaqin havo va artilleriya hujumlari amalga oshirilgan.

"Biroq, "Hizbulloh" tomonidan ularga qarshi kurash olib borilayotgani haqida maʼlumot berilmagan. Ular 24 soat oldin Isroilning dronini urib tushirishga muvaffaq boʻlganliklarini aytishdi, ammo bu ham hali tasdiqlanmagan xabar", deydi u.

Bu kungi mojarodan avval, yaʼni 15 oktabr kuni "Hizbulloh" Isroil shimolidagi Dalton, Dishon, Yaftah va Safed shaharlariga bir kechada toʻrtta raketa hamda 50 ga yaqin snaryad hujumini amalga oshirgandi. Shundan soʻng Isroil shimolidagi Safed va uning atrofidagi hududlarda sirenalar yangragan. 

Isroil mudofaa kuchlariga koʻra, snaryadlarning bir qismi tutib olingan. Isroillik harbiylar Livandan uchirilgan ikkita dron qulagani haqida xabar bergan. Qurbonlar haqida maʼlumot ochiqlanmagan.