Isroil Gʻarbiy Sohilda yangi qurilish rejasini maʼqulladi

Tel-Aviv maʼmuriyati okkupatsiya qilingan Gʻarbiy YaSohilning shimolida joylashgan Qafr Qadum qishlogʻidagi 3,5 gektar Falastin yerini tortib olishni koʻzda tutadigan yangi qurilish rejasini maʼqulladi.

Falastinni ozod etish tashkiloti (FOT)ga qarashli “Devor (sharmandalik devori) va yahudiy aholi punktlariga qarshi kurash kengashi” vakili Munif Nazzol rasmiy bayonot bilan chiqdi.

Falastin axborot agentligi WAFA xabariga koʻra, Nazzol shunday dedi:

“Mustamlakachi Isroil ommaviy axborot vositalarida eʼlon qilgan rejaga muvofiq, Qafr Qadum qishlogʻining shimolidagi 10-uchastkada 3,5 gektar yer musodara qilinadi”.

Uning taʼkidlashicha, mazkur reja Qafr Qadum qishlogʻi yerlarida qurilgan noqonuniy isroillik aholi punkti — “Metspe Yeshay”ni kengaytirish va unga 58 ta yangi turar joy qoʻshishni koʻzda tutadi.

BMT Isroilning okkupatsiya qilingan Falastin hududlaridagi aholi punkti faoliyati xalqaro huquqqa zid ekanini va bu harakat ikki davlatli yechim imkoniyatini yoʻqqa chiqarayotganini taʼkidlab keladi.

Isroil moliya vaziri Betsalel Smotrich oʻtgan oy Tel-Aviv hukumati Gʻarbiy Sohil hududining 82 foizini Isroil tarkibiga qoʻshishni rejalashtirayotganini va “Falastin davlati tuzilishiga yoʻl qoʻymaslik zarur”ligini aytgan edi.