АҚШ федерал ҳукуматининг ёпилиши иқтисодиётга кунига 15 миллиард доллар зарар келтириши мумкин

Бессент бу ҳақда Вашингтон шаҳрида CNBC телеканали томонидан ташкил этилган «Америкага инвестициялар» форумида сўзлар экан, президент Доналд Трампнинг иқтисодий сиёсатини қўллаб-қувватлади ҳамда федерал ҳукумат фаолиятини тиклаш зарурлигини таъкидлади.

“Биздаги ягона тўсиқ — федерал ҳукуматнинг ёпилиши. Бу жараён иқтисодиётга сезиларли таъсир кўрсатмоқда”, — деди у.

Вазирнинг сўзларига кўра, айни пайтда армия хизматчиларига маош тўланиши давом этмоқда, чунки Пентагон зарур маблағларни ажрата олаётгани қайд этилди. Шу билан бирга, у ҳукумат фаолиятининг тўхташи меҳнат бозорига салбий таъсир кўрсатиши, кичик бизнесда ишонч даражаси пасайганини ҳам таъкидлади.

Бессентнинг таъкидлашича, “ҳукумат ёпилиши иқтисодиёт учун жиддий синов бўлиб, иқтисодий ўсишга тўсиқ бўлаётган омиллардан бирига айланди”.

Эслатиб ўтамиз, АҚШ федерал ҳукумати 1 октябрдан бошлаб ёпилган. Бу Конгресс янги молиявий йил учун вақтинчалик бюджетни ўз вақтида тасдиқлай олмагани билан боғлиқ.