Шавкат Мирзиёев АҚШга амалий ташриф билан етиб борди

Давлат раҳбарини АҚШ давлат котибининг ўринбосари Кристофер Ландау, АҚШ–Ўзбекистон савдо палатаси раиси Керолин Лемм ҳамда бошқа расмий шахслар кутиб олди.

Шунингдек, Мирзиёев АҚШда таҳсил олаётган ва фаолият юритаётган бир гуруҳ ўзбекистонликлар билан суҳбат қилиб, ватандошларимизга ўз эзгу тилакларини билдирди.

Ташрифнинг асосий тадбирлари 5–6 ноябр кунлари бўлиб ўтади. Шу кунларда Президент Мирзиёев АҚШ Президенти Доналд Трамп билан музокаралар олиб боради ҳамда Марказий Осиё мамлакатлари ва АҚШ етакчиларининг “C5+1” форматдаги саммитида иштирок этади.

Дастурдан АҚШ Конгресси ва ҳукумати вакиллари билан учрашувлар, шунингдек, етакчи Америка компаниялари раҳбарлари билан музокаралар ҳамда ишбилармон доиралар иштирокидаги давра суҳбати ҳам ўрин олган.

Ушбу саммит Трамп иштирокидаги илк “C5+1” учрашуви бўлади. Аввалги шундай форматдаги саммит 2023 йил сентябр ойида, ўша пайтдаги АҚШ Президенти Жо Байден раислигида ўтказилган эди.

Эслатиб ўтамиз, жорий йил сентябр ойида Шавкат Мирзиёев ва Доналд Трамп телефон орқали мулоқот қилиб, минтақавий ҳамкорликни чуқурлаштириш масалаларини муҳокама қилган эдилар. Сентябр ойи охирида эса улар Нью-Йорк шаҳрида учрашиб, Ўзбекистон–АҚШ стратегик шериклик муносабатларини янада ривожлантиришга келишиб олган эдилар.